O boletim em latim do Vatican News

“HEBDOMADA PAPAE”

   Notitiae Vaticanae Latine redditae

Die undecimo mensis Martii anno bismillesimo vicesimo tertio

(TITULI)

Póntifex ad féminas: ipsae útique humaniórem effíciunt societátem suo visu suóque corde.

Consílium Cardinálium rénovat Francíscus.

Pontíficis chirógraphus ac novum statútum: IOR renovátur.

Felícem exóptat diem Márius Galgano ómnibus haec verba, sermóne Latíno proláta, audiéntibus.

(NOTÍTIAE PRAECIPUAE)

Die inter Natiónes féminis dicáto, in Audiéntia Generáli die Mercúrii Póntifex suam vertit in féminas cogitatiónem. Ipse quoque hortátur e memória ne excédat sauciáti Ucraínae pópuli dolor. Refert Olga Sakun.

Quadragésima, eláte lóquitur Póntifex, “tempus sit acceptábile ut nostram missionálem vim adhibeámus ad Evangélio hominibúsque laetánter famulándum”, adhaeréntes Ecclésiae, ad conversiónem invitánti et ad paeniténtiam, laeti mundo Evangélium nuntiatúri”. Die inter Natiónes féminis dicáto, in Audiéntia Generáli catechési perácta, Póntifex ad omnes féminas se convértit, in primis ad illas in Petriáno Foro adstántes. Hortátu ínsuper Pontíficis, usque “nostris in córdibus nostrísque precatiónibus” manére debet sauciátus Ucraínae pópulus, cuius numquam oblivísci debémus dolórem.

Francíscus Papa Cardinálium Consílium renovávit, quod C9 (ke novem) appéllant, útpote cum illud prístinum cessáverit. Lóquitur Rosárius Tronnolone.

Ídeo partícipes novi Consílii nominávit: qui sunt cardináles Petrus Parolin, Secretárius Status; Ferdinándus Vérgez Alzaga, praeses Gubernatorátus Status Civitátis Vaticánae; Fridolínus Ambongo Besungu, archiepíscopus Kinshasánus; Osváldus Gracias, archiepíscopus Bombaiénsis; Ioánnes Patrícius O’Malley, archiepíscopus Bostoniénsis; Ioánnes Ioséphus Omella Omella, archiepíscopus Barcinonénsis; Geráldus Lacroix, archiepíscopus Quebecéncis; Ioánnes Cláudius Hollerich, archiepíscopus Luxemburgénsis; Sérgius da Rocha, archiepíscopus Sancti Salvatóris in Brasília. Commissiónis secretárius est Marcus Mellino, Epíscopus título Cresiménsis. Próxima Consílii coadunátio die quarto et vicésimo mensis Aprílis, hora nona, apud Domum Sanctae Marthae evéniet.

(NOTÍTIAE BREVÍSSIMAE)

IOR (quod est compendiátis verbis Institútum Óperum Religiónis) renovátur: minus quáttuor annis transáctis a Statúto novíssime recógnito, Institútum Óperum Religiónis mutátur, ad novam Constitutiónem apostólicam Praedicáte Evangélium accommodándum: offícia in quinquénnium retinéntur, quae semel renovári possunt; regíminis structúra agílior erit in qua múnera áptius finiúntur vária inter órgana ne quaedam superponántur neve óperae duplicéntur. Quod ex chirógrapho Francísci Papae novóque Statúto exstat, quodque die séptimo mensis Mártii innótuit, cum renovarétur IOR.

Haec dícere habúimus, nova enuntiábimus próxima hebdómada.