Hebdomada Papae, o boletim em latim do VN

“HEBDÓMADA PAPAE”

NOTÍTIAE VATICÁNAE LATÍNE RÉDDITAE

Die octávo mensis Iúlii anno bismillésimo vicésimo tértio

TÍTULI

In Angélica salutatióne, praetérito die domínico, haec nuntiávit Póntifex. “Álii ex ánimo audiéndi ut inter se intéllegant”. Idem pro pace precátur.

Novórum mártyrum, fídei téstium, Commíssio prae Iubilǽo constitúitur.

In núntio televisífico de precatióne mensis Iúlii, hortátur Póntifex ut “sacra Eucharístia própriae vitae príncipem óccupat locum”.

Salútem plúrimam ómnibus vobis auscultántibus núntios Latína lingua prolátos dicit Eugénius Murrali.

NOTITIAE

Prophéta ac mútuus audítus praecípuum óbtinent locum in Angélica Precatióne, die praetérito domínico. Ad Pontíficis mentem unusquísque “prophéticum donum póssidet communicándum”, cum álius álium récipit, contentiónes deléri solent. Refert Mónia Parente.

“Quot contentiónes vitári possunt ac solvi, cum quis álios auscúltat eósque ex corde intellégere vult!”: haec sunt Pontíficis verba, novus núntius mútuae receptiónis. “Qui récipit prophétam in nómine prophétae, mércedem prophétae accípiet” (Mt 10, 41): ex his Evangélii secundum Matthǽum verbis sumens inítium, Francíscus éxplicat “unumquémque nostrum esse […] prophétam. Étenim per Baptísmum prophetíae donum missionémque omnes recépimus”. Mónuit Póntifex ut a mágicis inanísque opinatiónibus de prophetía caveátur et auscultándi pondus extóllit: “Unusquísque nostrum ab áliis díscere debet”. Post Angélicam Precatiónem ad mundánas dimicatiónes convértitur cogitátio: “Hoc quoque aestátis témpore pro pace oráre ne gravémur, cumprímis pro Ucraínae pópulo, perquam vexáto. Réliqua bella ne obliviscámur, quae pro dolor saepe e memória elabúntur”.

Coetus quidam apud Dicastérium de Cáusis Sanctórum constitúitur ad índicem conficiéndum christianórum mártyrum in postréma sǽculi quarta parte. Quod Francíscus decrévit prae Iubilǽo anni bismillésimi vicésimi quinti. Refert Míchaël Raviart.

“In Ecclésia mártyres spei sunt testes quae ex fide in Christo óritur et ad veram caritátem íncitat”: haec sunt litterárum verba quibus “Commissiónem Novórum Mártyrum – Fídei Téstium” - constítuit Póntifex. Commíssio inquírere pergit, quod in Iubilǽo anni bismillésimi coeptum agi, ad Fídei Testes reperiéndos in hac prima sǽculi quarta parte, quodque ad in futúrum aevum producéndum. “Mártyres – éxplicat Francíscus – Ecclésiae vitam omni témpore sunt comitáti atque florent sicut ‘fructus matúri praestantésque in Dómini vínea’ hódie quoque … Mártyres plures sunt hoc témpore quam primis sǽculis: sunt nempe epíscopi, presbýteri, consecráti consecratǽque, láici ac famíliae qui in váriis terrárum orbis Natiónibus, per vitae donum, suprémam caritátis testificatiónem perhibuérunt”. Secúndum quod sǽpius definívit Francíscus “oecumenísmum sánguinis”, inquisítio omnes christiánas confessiónes contíngit et non modo cathólicos.

NOTÍTIAE BREVIÓRES

 “Orémus ut cathólici Eucarístiae celebrándae praecípuum locum tríbuant, quae humánas necessitúdines commútat efficítque ut Deo ac Frátribus óbviam eátur”. Sic est locútus Francíscus Papa in núntio televisífico de precatióne mensis Iúlii, quem Rete Mundiále Precatiónis diffúdit.

Die tértio praetérito mensis Iúlii apud FAO, ut áiunt, in núntio quodam quem legit reveréndus dóminus Chica Arelliano, Sanctae Sedis observátor apud institutiónes Natiónum Unitárum quae cibórum securitátem curant, Póntifex de necessitáte eláte est locútus ut una simul ópera darétur ad ómnibus dignitátem tribuéndam, deficiénti alimónia declináta.

Satis dictum est, nova, próxima hebdómada nuntiábimus.