Hebdomada Papae, o boletim em latim do Vatican News

HEBDÓMADA PAPAE”

NOTÍTIAE VATICÁNAE LATÍNE RÉDDITAE

Die undécimo mensis Novémbris anno bismillésimo vicésimo tértio

TÍTULI

Verba Pontíficis: satis est de bello et aerúmnis. Aequam pacem déferat Deus.

Apud Sanctam Martham sacro fonte Ucraínum infántem aspérgit Francíscus.

“Life. La mia storia nella Storia”, verno témpore novus edétur Pontíficis liber.

Salútem plúrimam ómnibus vobis auscultántibus núntios Latínos dicit Márius Galgano.

NOTÍTIA 1

Post catechésim Audiéntiae Generális die Mercúrii, Francíscus Papa dénuo est cohortátus ut pro pópulis orarétur qui várias contentiónes patiúntur, nomináti vexátam Ucraínam mémorans itémque Israelítes ac Palaestinénses. Refert Olga Sakun.

Ítalos peregrínos salútans Póntifex, qui in Petriánum Forum pervenérunt Audiéntiam Generálem participatúri, de pace conciliánda instánter obtestátus est. “Bellum semper est clades, ne obliviscámur, semper est clades”, iterávit Póntifex. Fidélibus ínsuper Arábici sermónis benedícens, tutélam invócat Póntifex “ab omni malo” atque peculiárem in modum a Dómino Iesu donum póstulat. Post catechésim, Magdalénae Delbrêl, mýsticae, sociáli minístrae, scriptríci ac poétriae dicátam, ad céteros peregrinórum coetus se convértit Francíscus, nominátim ad Francogállos, in primis ad partícipes Uniónis Nationális Consociatiónum Familiárum Catholicárum.

NOTÍTIA 2

Difficílibus tempóribus magnae laetítiae áliquit adest. Quod expérti sunt iúvenes paréntes Ucraíni Zacharíae, qui est infans trium ménsium, in Sanctae Marthae sacéllo die Lunae sexto mensis Novémbris a Francísco Papa sacro baptísmate ablútus. Refert Rosárius Tronnolone.

Pater Vitális nuncupátur, trigínta septem annórum, mater Vita, trigínta quinque annórum, infans postrémus est e decem líberis, quorum septem sunt mares, tres féminae. In óppido Kamianets-Podilskyi, in occidentáli Ucraína, morántur, quae régio quodámmodo longe abest a bello a Rússia mense Februário praetériti anni illáto. Pértinent a neocatechumenále iter atque his annis inter tot familiáres difficultátes providéntiam sunt expérti, quae post Rússicum aggréssum multo gravióres sunt factae.

“Sauciáti pópuli Ucraíni” míseras condiciónes memoráre pergit Francíscus: párvuli Zacharíae Baptísmus nova est spes huius novae frequentísque famíliae, quae bellum oblivísci non potest, cui autem pacis aevi est spes.

NOTÍTIAE BREVÍSSIMAE

 “Life. La mia storia nella Storia”, iste novi Francísci Papae libri est títulus, in quo suae vitae históriam primum narrat per evéntus, qui humánum genus affecérunt, a secúndo mundáno bello, anno millésimo nongentésimo tricésimo nono exórto, cum esset párvulus fere trium annórum, usque ad nostram aetátem. Volúmen a HarperCollins Publishers edétur, sicut hac hebdómada est nuntiátum.

Sicut avus suis nepótibus: sic septem mílibus puerórum se osténdit Francíscus Papa, qui ex octogínta quattuor Natiónibus in Urbem Vaticánam pervenérunt ut die Lunae postmerídiem occúrsum participárent qui est “Púeri Pontíficem convéniunt”. Percontatiónes ac responsiónes préssius a púeris ponúntur, étiam ad ipsum Pontíficem pertinéntes.

Satis dictum est, réliqua nova, próxima hebdómada.