Hebdomada Papae, o boletim em latim do Vatican News

“HEBDÓMADA PAPAE”

NOTÍTIAE VATICÁNAE LATÍNE RÉDDITAE

Die décimo tértio mensis Aprílis anno bismillésimo vicésimo quarto

(TÍTULI)

Pontíficis senténtia: ubíque bellum géritur. Sit pax in Ucraína, Terra Sancta, et Myanmar
Praesto est index humánae dignitátis “gráviter violátae”.
Francíscus asséverat: fortitúdinis virtus éfficit ut nos terrárum orbis malis obsistámus illud “non” clamántes.
Salútem plúrimam ómnibus vobis auscultántibus núntios Latínos dicit Márius Galgano.

(NOTÍTIA 1)

Francíscus Papa Audiéntiae Generális sub finem in Petriáno Foro die Mercúrii suas cogitatiónes “frátribus sororibúsque” convértit, “complúra patiéntibus” propter hodiérnas dimicatiónes ac proelia: “ne eos obliviscámur”. Refert Olga Sakun.

Itálico sermóne salútans, scriptum depónens et ad frequéntes fidéles in Foro Petriáno se convértens, vento flante, Póntifex sua verba iteráre studet: “Mea cogitátio dirígitur ad funestátam Ucraínam et Palaestínam et Ísrael”. “Ubíque bellum géritur”, atque, pósito scripto, addit:  “Ne obliviscámur Myánmar”, Ásiae Natiónem quam anno bismillésimo séptimo décimo Francíscus invísit, quae usque adest in eius precatiónibus hortationibúsque, ob óculos potíssimum hábita gente Rohingya, quae minor pars est muslímae religiónis eáque despécta ac sepósita.

(NOTÍTIA 2)

Documéntum Dicastérii pro Doctrína Fídei, cuius títulus “Dígnitas infiníta”, ad opus perficiéndum quinque annos sibi postulávit atque papále magistérium postrémi decénnii secum fert: a bello ad paupertátem, a vi in migrántes, in féminas, ab abórtu ad maternitátem substitútam, ad euthanásiam, a géneris identitáte tractánda ad digitálem vim. Amadéus Lomonaco lóquitur.

Quaedam nova hoc in scripto continéntur, quae áttinent ad magni pónderis documénta recéntis pontifícii magistérii eáque cum bioéthicis rebus coniungúntur. Prióribus in tribus pártibus declaratiónis princípia potióra afferúntur. Ambiguitátem collústrat documéntum illórum qui asséverant ac sátius habent Verba “dignitátem personálem” quam “dignitátem humánam”, quandóquidem persónam putant dumtáxat, “quae cogitáre valet”.

Declarátio ígitur índicem éxhibet “quarúndam grávium dignitátis humánae violatiónum”, sed étiam ómnia quae persónae humánae integritátem commínuunt, sicut amputatiónes, torménta cum córporis tum mentis, coactiónes animórum”.

(NOTÍTIAE BREVÍSSIMAE)

Fortitúdinis virtúti, “quae ad superándos metus, angóres ac vitae probatiónes nos ádiuvat”, suam catechésim in Generáli Audiéntia Mercúrii die dicávit Francíscus.

Páucis exáctis diébus a cardinále Ángelo De Donatis paenitentiário maióre nomináto, qui ab anno bismillésimo séptimo décimo cardinális Romae Vicárii gessit munus, Francíscus Papa suis próximis cooperatóribus edíxit, “propter cardinális vicárii múneris pondus”, témporis áliquid se sumptúrum “ut eum discérnere posset qui tale offícium probe obíre valéret”.

Necessariórum legátio illórum, qui die séptimo mensis Octóbris ab Hamas sunt capti, die Lunae a Francísco Papa horam círciter recépta est.

Nihil ámplius dicéndum putámus, nova próxima hebdómada habébitis.