Hebdomada Papae, o boletim em latim do Vatican News

“HEBDÓMADA PAPAE”
NOTÍTIAE VATICÁNAE LATÍNE RÉDDITAE

Die vicésimo mensis Aprílis anno bismillésimo vicésimo quarto

TÍTULI

De bello in Ucraína ac Terra Sancta: Póntifex óbsecrat ut captívi liberéntur.
Párvulis dicit Póntifex: Romae Die Mundiáli parvulórum vos exspécto.
Mense Septémbri Pontíficis iter suscipiétur in Oceániam.
Salútem plúrimam ómnibus vobis auscultántibus núntios Latínos dicit Amadéus Lomonaco.

NOTÍTIA 1

In Generáli Audiéntia, post catechésim, Francíscus Papa Terrae Sanctae et Ucraínae memorávit gentes qui omne tormentórum genus damnávit. Eándem catechésim temperántiae virtúti dicavit. Refert Alexánder De Carolis.
Pontíficis mens animúsque in Terra Sancta versátur aeque in “vexáta” Ucraína. Póstulat item Póntifex ut captívi proeliórum liberéntur, qui “foedíssimum” et “inhumánum” iúdicat captivórum cruciátum. Torménta et cruciátus – addit Francíscus – “hóminis dignitátem” vúlnerant. Per catechésim Póntifex hortátur ut de quarta cardináli virtúte cogitétur, quae est temperántia. Haec est aequae mensúrae virtus, asséverat Francíscus: “Qui ánimi ímpetu aut nímio ardóre usque agunt infídi tandem reperiúntur”. “In terrárum orbe ubi tot hómines quod censent se effári gloriántur, témperans quidem homo – éxplicat Póntifex - de re cogitáre mavult, de qua est dictúrus”.

NOTÍTIA 2

Regína Caeli recitáta, omnes púeros puellásque terrárum orbis invitávit Póntifex, ut Romae exspectatíssimum evéntum participárent: primum scílicet Diem Mundiálem puerórum. Refert Márius Galgano.
Regína Caeli recitáta, Francíscus Papa postulávit ut adstántes precatióne iter comitaréntur ad Primum Diem Mundiálem puerórum, die vicésimo quinto sextóque mensis Máii Romae celebrándum. Opus est – dixit Póntifex – parvulórum desidério “melióris terrárum orbis habéndi”. Adhortátus est ínsuper Póntifex ad orándum pro párvulis, qui in Ucraína, Palaestína, Ísrael aliísque terrae locis propter bellum patiúntur. Sollicitúdinem quoque maerorémque osténdit Francíscus, proptérea quod Iránia Ísrael percússit, ipséque quaesívit ut “cúilibet áctui interdicerétur, violéntiae sériem productúro, ex perículo Médium Oriéntem ad bellum ducéndi vel máius. Precatiónis témpore quae est Regína Caeli, Póntifex est omnes hortátus ut laetítiam occúrsus cum Christo transmítterent.

NOTÍTIAE BREVÍSSIMAE

Francíscus Papa Indonésiam, Pápuam Novam Guinéam, Timóriam Orientalem et Singapúram a die áltero ad diem tértium décimum mensis Septémbris invíset. Quod patefécit Sedis diurnariórum Vaticánae moderátor, Matthǽus Bruni, qui item dixit itíneris rerum gestandárum índicem próxime iri evulgátum.
Die sexto décimo mensis Aprílis, in Domo Sanctae Marthae, in urbe Vaticána finis est impósitus Consílio Cardinálium. Óperum témpore – ut ex Sede diurnariórum Vaticána innótuit – de bellórum exítio váriis in terrárum orbis locis, de Sýnodi provocatiónibus ac de complénda Constitutióne apostólica “Praedicáte Evangélium” in dioecesánis Cúriis sermo est factus.
Finis fit loquéndi, nova próxima hebdómada tradémus.