Hebdomada Papae, o boletim em latim do Vatican News de 12 de outubro

HEBDÓMADA PAPAE”

NOTÍTIAE VATICÁNAE LATÍNE RÉDDITAE

Die duodécimo mensis Octóbris anno bismillésimo vicésimo quarto

TÍTULI

Domínico die sexto mensis Octóbris rosárium orávit Francíscus pro pace in papáli Basílica Sanctae Maríae Maióris, una cum Sýnodi particípibus.

In Audiéntia Generáli die Mercúrii praetérito de Spíritu Sancto catechésim revocávit Póntifex qui Ecclésiae “universalitátem” praestat et “unitátem”.

Die séptimo mensis Octóbris, anniversárius recensétur dies incúrsus Hamas advérsus Ísrael; epístulam misit Póntifex ad Médii Oriéntis cathólicos: “vobíscum sum”.

Salútem plúrimam ómnibus vobis audiéntibus núntios Latínos dicit Eugénius Murrali.

NOTÍTIAE

Postquam est adhortátus ad bellum deponéndum ex Petriáno Foro, in Angélica Salutatióne, die domínico post merídiem, una cum complúribus fidélibus ac Sýnodi particípibus, Póntifex rosárium recitávit coram effígie quae appellátur Salus Pópuli Románi. Refert Alexánder De Carolis.

“Oh pacis Regína… illórum convérte ánimos qui ódium fovent, da ut armórum strépitus síleat, mortem afferéntium, violéntiam exstíngue quae in hóminum corde insídet atque pacis propósita cóncita in illis qui agunt ac moderántur Natiónes”, verbis his Póntifex, apud Sanctam Maríam Maiórem ad Vírginem Maríam sese convértit, mense ipso ei dicáto. Precatióni interfuérunt de Synodalitáte Sýnodi partícipes, quae nunc laborióse operátur, Cúriae Románae officiáles, Corpus legatórum apud Sanctam Sedem. Coram effígie quae Salus Pópuli Románi nuncupátur, Maríae supplicávit Póntifex: “Veni ad nos adiuvándos his quidem tempóribus quibus iniústa convaléscunt ac bella vastant”.

 “Ecclésiae únitas est hóminum únitas quae ratiocínio non effícitur, sed ex vita”: sic Póntifex est effátus in Audiéntia Generáli, cum catechésim de Spíritu Sancto ac Sponsa enodáret. Refert Catharína Agorelius:

Quaedam meditánda de Spíritu Sancto propósuit Póntifex, ab Áctibus Apostolórum sumens inítium ac nominátim a Pentecóstes narratióne (Act 2). Ubi sanctus Lucas “osténdit quo pacto Spíritus Sanctus Ecclésiae universalitátem et unitátem praestet”. Asséruit ínsuper Francíscus, Hierosolymitánum cognominátum áfferens Concílium (Act 15), quómodo Spíritus Sanctus ágeret, “étiam – ac plerúmque – laténti ópere, témpora et humánam discrepántiam obsérvans, per hómines et institutiónes tránsiens, per precatiónes et collatiónes. Synodáli – hódie dicerémus – ritu”. Sub occúrsus finem Póntifex, Mariáli mense, pacis spem Vírgini Maríae commísit, pro pópulis precans qui “belli améntiam” experiúntur, nominátim in Ucraína, Palaestína, Myanmár, Sudánia.

NOTÍTIAE BREVÍSSIMAE

Die séptimo mensis Octóbris propinquitátis epístulam ad omnes credéntes Médii Oriéntis misit qui bellum patiúntur: “Ódii favílla quae abhinc annum exársit non est exstíncta. Turpe quidem est quod inter Natiónes commúnitas ac potentióres Civitátes effícere néqueant ut arma síleant ac pernicióso bello finis imponátur”.

In Angélica Salutatióne índicem legit Francíscus futurórum cardinálium, quorum ritus agétur in Consistório die octávo consequéntis mensis Decémbris. Oriúndi nempe ii sunt ex ómnibus terrárum orbis pártibus, ex Iránia quoque et Indonésia. Inter Ítalos adest excellentíssimus dominus Reina, novus Románae dioecésis Vicárius: “Scio diffícile munus me manére, quóniam nostra Urbs est venústa, at perquam implicáta”.

Die praetérito undécimo mensis Octóbris Francíscus Papa et Vladimírus Zelenskyy simul convenérunt de “sauciáta” Ucraína locutúri.

Haec dicénda habúimus, próxima hebdómada, nova ac recentióra.