Vdiq në burg, në Rusi, opozitori Alexey Navalny

R.SH. – Vatikan

Disidenti dhe opozitari kryesor rus, Alexei Navalny, vdiq sot (16 shkurt 2024), në moshën 47-vjeçare, në burgun arktik nr. 3, pasi u ndie keq, në përfundim të një shëtitjeje të zakonshme. Njoftimin e jep Shërbimi Kombëtar i Burgjeve të Rusisë.

“Bota humbi një luftëtar, guximi i të cilit do të kujtohet me breza”. Këto janë fjalët e kryetares së Parlamentit Evropian, Roberta Metsola, pasi mësoi për vdekjen e Alexei Navalny-t. Lajmi, ndërkaq, u përhap me shpejtësi në gjithë botën. Sipas televizionit shtetëror, kundërshtari kryesor i presidentit Vladimir Putin vdiq nga embolia. Ai u mbajt për një kohë të gjatë, pa një proces të drejtë, në burgjet e regjimit rus. “Ndihem tmerrësisht keq – pohon Metsola – për vdekjen e fituesit të çmimit Sakharov. Rusia ia hoqi lirinë dhe jetën, por jo dinjitetin. Lufta e tij për demokraci vazhdon të jetojë”. E kryeparlamentarja evropiane përfundon me një mendim për gruan dhe fëmijët e Navalny-t, duke u shprehur atyre afërsi.

Navalny mbahej në burg që nga janari i vitit 2021 dhe vuante një dënim me 19 vjet burgim. Në mesazhin e tij të fundit në platformën X, në datën 14 shkurt, denoncoi se e kishin vënë në izolim, për dënim, për të katërtën herë në dy muaj e se kësaj radhe, do të qëndronte aty për 15 ditë me radhë.