Shenjtorët e javës 5 – 12 maj

R.SH. - Vatikan

E diel më 5 maj, Kisha katolike romake kremton të dielën e 6-të e Pashkëve, ciklit të dytë, sipas kalendarit kishtar, gjithnjë mё 5 maj, kalendari pёrkujton shёn Maksimin, ipeshkëv i Jeruzalemit, shën Angjelinin dhe të Lumin Nuncio Sulpricionga Napoli.

Në pjesën e Ungjillit të kësaj së Diele të Pashkëve nga shën Gjoni, Jezusi na tregon udhën që duhet ndjekur, udhën e dashurisë. E kjo na kujton se Ai na do, edhe pse nuk e meritojmë dashurinë e Tij. Udha që na tregon Jezusi është udhë konkrete, udhë, që na nxit të dalim nga vetvetja, për të shkuar drejt të tjerëve. Jezusi na tregoi se dashuria e Hyjit vihet në jetë në dashurinë për të afërmin.

Të hënën  më 6 maj, kalendari kishtar përkujton shën Marjanin e shën Jakun, martirë. 

Të martën më 7 maj, kalendari përkujton shën Florianin, shën Flavia Domitilen, martire romake; shën Flavianin e Augustinin dhe të Lumën Roza Venerini, virgjër e themeluese të Motrave ‘Mësuese të Përshpirtshme Venerini’. 

Të mërkurën më 8 maj,  Kisha katolike kremton festën e Zojës së Bekuar të Pompejit. Po më 8 maj kalendari liturgjik përkujton shën Viktorin, martir të Milanos, shën Benediktin e II, papë, dhe shën Magdalenën e Kanosës.  

Të enjten më 9 maj, kalendari përkujton shën Pakomin, abat dhe shën Izainë, profet.

Të premten më 10 maj,  kalendari kishtar përkujton shën Jordanin, martir; shën Jobin, shën Kataldin dhe të Lumin Nikola Albergatin. 

Të shtunën më 11 maj, kalendari përkujton shën Injacin e Lìkonit, shën Gualtierin apo Walterin.

Të dielën e ardhshme më 12 maj, Kisha katolike do të kremtojë festёn e të Ngjiturit të Jezu Krishtit në Qiell, festë që tek shqiptarët njihet si festa e Të Shëlbuemit. Gjithnjё mё 12 maj, kalendari kishtar përkujton shenjtorët Nereu, Akileu e Pankraci, martirë, shën Pankracin, martir e shën Leopoldin Mandiç.