Kthehet Çmimi Navarro-Valls, vlerësim për kë zgjedh solidaritetin
R.SH. – Vatikan
Çmimi Ndërkombëtar Joaquín Navarro-Valls për Lidershipin dhe Dashamirësinë, në edicionin e tij të dytë, kthehet të hënën, më 8 korrik, në Sallën e Protomotekës së muzeumeve të komunës së Romës dhe dyfishon numrin e protagonistëve, që janë dalluar në fushat e tyre përkatëse, për aftësitë e tyre drejtuese dhe për kontributin e rëndësishëm në shoqëri, në kërkim të "Së mirës së njeriut”. Do të zgjidhen fitimtarë nga një profil "Senior" dhe një "Junior".
Anëtarët e jurisë
Komiteti Shkencor i Çmimit, përgjegjës për zgjedhjen e kandidatëve (tre për secilën kategori), kryesohet nga Federico Eichberg dhe përfshin anëtarë të tjerë si Matteo Colaninno, Giuseppe Cornetto Bourlot, Stefano Lucchini dhe Luisa Todini. Juria përbëhet nga presidenti i Fondacionit të Universitetit Biomjekësor, Alessandro Pernigo dhe nga Paolo Arullani, Ferruccio De Bortoli, Bianca Maria Farina, Gianni Letta dhe Lucia Vedani.
Mbështetja e talentit në vështirësi
Përveç ceremonisë së ndarjes së çmimeve, veprimtaria do të jetë edhe mundësi për të mbledhur fonde, që do të shërbejnë për bursat e dhëna nga Universiteti Campus Bio-Medico i Romës, me qëllim garantimin e së drejtës për të studiuar, promovimin e përfshirjes dhe mbështetjen e zhvillimit të studentëve të talentuar me vështirësi ekonomike. Fondacioni i Universitetit Biomjekësor - organizatë jofitimprurëse, që mbështet zhvillimin e Universitetit dhe të Fondacionit Poliklinik Universitar “Campus Bio-Medico” - e organizon këtë ngjarje në kujtim të bashkëthemeluesit të tij, Joaquín Navarro-Valls, mjek dhe gazetar, zëdhënës i Papës Gjon Pali II dhe drejtor i Sallës së Shtypit të Selisë së Shenjtë për 22 vjet, nga viti 1984 deri në vitin 2006.
Lidershipi dhe dashamirësia
Objektivi i Çmimit - i cili vitin e kaluar iu dha sipërmarrësit Brunello Cucinelli - është të identifikojë dhe të vlerësojë personalitete me rëndësi, që mishërojnë vlerat e lidershipit dhe të dashamirësisë në impenjimin e tyre social, kulturor, sportiv, shkencor, ekonomik dhe institucional. Promovohen kështu modele, që kontribuojnë në përmirësimin e shoqërisë, përmes solidaritetit dhe dashamirësisë për një botë më të përgjegjshme, më të qëndrueshme, më gjithëpërfshirëse dhe më të vëmendshme ndaj dinjitetit të njeriut.
