Nëntëditëshi i Krishtlindjes
R.SH.- Vatikan
Që nga e diela e kaluar, e Diela e Tretё tё Kohёs sё Ardhjes, qё na paraprinë e pёrgatit pёr kremtimin e Lindjes sё Jezu Krishtit, Kisha katolike romake e filloi edhe Nёntёditёshin e kёsaj sё kremte madhore të Këshndellave.
Në liturgjinë e tri të dielave të para tё kohёs sё Ardhjes e në ditët e pushimit, deri më 16 dhjetor, theksohej me forcë tema e Ardhjes së dytë të Jezusit, në fundin e kohëve. Ndërsa ndërmjet 16 e 24 dhjetorit, kujtohen çdo ditë skena, ngjarje e profeci, që na çojnë drejt Shpellës së Betlehemit, drejt kremtimit të Ditëlindjes së Birit të Zotit, që përkujtohet sidomos nëntë ditë para Solemnitetit.
Nëntëditshi i Krishtlindjes kremtohet në periudhën e dytë të Kohës së Ardhjes.
Kujtojmë se takimet e bashkësisë së krishterë nëntë ditë me radhë para festës së Krishtlindjes, kanë karakter thellësisht popullor e festohen krahas liturgjisë zyrtare. Shprehje e përshpirtërisë së popullit, vijnë nga Mesjeta e largët, për të përforcuar fenë e devocionin ndaj Zemrës së Krishtit, Virgjërës Mari e Shenjtorëve.
Kjo traditë lindi në kohët kur bashkësia e krishterë ishte larg burimeve të Biblës e të liturgjisë, ose kur këto burime ishin të ndaluara e populli shtegtonte si në shkretëtirë, plot etje, në pritje të ujit të gjallë. Shtegtim, që vijon edhe në kohët moderne, në të cilat populli i Zotit përpiqet ta ruajë të pacenuar traditën e vet, e, pa harruar përmasën kishtare, merr pjesë nëntë ditë me radhë në kremtimet prekëse tradicionale, shoqëruar kryesisht me muzikë gregoriane. Kremton me besimin e sigurt se shpresa nuk të zhgënjen, vetëm atëherë kur pranohet me gjithë zemër.
Atëherë duke kërkuar praninë e Zotit në jetën tonë të përditshme, me fjalët e antifonave të mëdha të Nëntëditëshit që paraprin Krishtlindjen, të kërkojmë e urojmë: “O urti, o çelësi i Davidit, o mbret i popujve, eja!”. E të përsërisim shumë herë ‘Eja!’ dhe të përpiqemi, që shpirti ynë të mos thotë: ‘Mos më shqetëso!’. Jo! Të jetë shpirt i hapur, të jetë shpirt i madh, për ta pritur Zotin e për ta dëgjuar atë, që na thotë Kisha në festën e Krishtlindjes me anë të antifonës: ‘Ta dini se sot vjen Zoti! E nesër do të shihni lavdinë e Tij!’
