Át Faltas: “gratë janë endëse të paqes”

R.SH. – Vatikan

Át Ibrahim Faltas

"Ai që i bën keq një gruaje përdhos Zotin". Papa Françesku i tha këto fjalë gjatë predikimit të tij në Meshën për Ditën Botërore të Paqes, më 1 janar. I mendova këto fjalë – shkruan në gazetën vatikanase vikari i Rojtarisë së Tokës Shenjte, Át Ibrahim Faltas - ndërsa lexova një raport të fundit të OKB-së: që nga 7 tetori, dy gra vriten çdo orë në Gaza. Gratë dhe fëmijët përbëjnë 70 për qind të vdekjeve. Të shtunën, një grua shtatzënë u plagos rëndë gjatë një bombardimi; mjekët arritën të lindnin fëmijën ndërsa nëna vdiq.

Mendova sërish fjalët e Papës: "...përdhosin Zotin, sepse ai është lindur nga një grua". Shenjtja Mari ishte lidhja ndërmjet tokës dhe qiellit: ajo dëgjoi dhe pranoi vullnetin e Hyjit; ajo pranoi pasojat; ajo ishte nënë e vëmendshme, e matur dhe e vuajtur. Çfarë shembulli dhe çfarë modeli për të gjitha gratë, besimtare dhe jobesimtare, nëna e murgesha! Ati i Shenjtë, shpesh, na bën thirrje ta respektojmë rolin e gruas si në Kishë ashtu edhe në shoqërinë civile. Jam i bindur – vijon Át Ibrahim Faltas - se gratë, me forcën e tyre të brendshme dhe me përkushtimin ndaj të afërmve, janë të domosdoshme për arritjen e paqes në botë.

 Ne duhet të udhëhiqemi nga zemrat e nënave dhe të grave, që e shikojnë njerëzimin me sy të vëmendshëm dhe të heshtur, që ofrojnë vuajtjet e tyre për të mirën e të tjerëve, që i ndiejnë nevojat dhe u paraprijnë atyre me përkushtim të plotë. Me hirin e Zotit, nënën time e kam pasur si shembull gruaje besimtare, e cila në heshtje dhe me sakrifica ia kushtoi jetën fëmijëve, familjes dhe të varfërve.

Gratë janë në gjendje të endin paqen; ato nuk dorëzohen para së keqes; ato përpiqen të shërojnë dhe të mbrojnë; ato dinë të administrojnë burimet dhe marrëdhëniet; nuk lejojnë kurrë të mungojë dashuria e vërtetë, dashuria që nuk vdes nga indiferenca apo harresa. Atë dashuri, që Zoti nuk do t’ia mungojë asaj vajzës së vogël në Gaza, lindur tashmë jetime, por me forcën e kraharorit të nënës së saj, e cila e mirëpriti dhe e deshi që para se ta shihte dhe të mund ta mbante në krahë. Të mos i harrojmë këto viktima të pafajshme - të vdekurit dhe të mbijetuarit - dhe të mos e harrojmë dashurinë e nënave dhe forcën e grave.

 Ta respektojmë, ta ruajmë dhe ta mbrojmë dinjitetin e grave që ta bëjmë njerëzimin më të mirë dhe ta mposhtim urrejtjen dhe dhunën – përfundon artikulli i Át Ibrahim Faltas në gazetën vatikanase “L’Osservatore Romano”.