Është i Lum Stefano Douayhy, Semeraro: bari në shërbim të së mirës së përbashkët
R.SH. - Vatikan
Ishte bari i "së mirës ekumenike, gjallëruar nga ndjenja e fortë e katolicitetit të Kishës" në rrethana "shpesh të vështira nga marrëdhëniet me fetë e tjera të krishtera dhe me Islamin". Kardinali Marcello Semeraro, prefekt i Dikasterit për Çështjet e Shenjtorëve, e përshkroi kështu Stefano Douayhy në Meshën e lumnimit, kremtuar si përfaqësues i Papës Françesku dje, më 2 gusht, në Pallatin Patriarkal të Bkerke, në Liban. Të pranishëm, 13 mijë besimtarë.
Qyteti, me pamje nga gjiri i Jounieh, nuk është shumë larg nga Ehden, ku lindi më 2 gusht 1630, patriarku i Antiokisë së Maronitëve, shpallur i Nderuar në vitin 2008 nga Benedikti XVI. Kardinali e kujtoi si "bari të mirë, që vuan me grigjën e tij dhe bën gjithçka është e mundur për ta rritur, për ta mbrojtur, për ta kullotur ndër vise të blerta" në ngjasim të Krishtit.
Sot, përkundrazi - theksoi prefekti i Dikasterit për Çështjet e Shenjtorëve - "ka njerëz të cilët në vend që të vihen në shërbim të së mirës së përbashkët, mendojnë vetëm për mirëqenien vetjake. E në vend që të ecin në udhën e shenjtërisë, zhgërrahen në shitigjet e rrezikshme të pasurisë e të veseve!
Më se 30 vjet në krye të maronitëve
Shembull "bamirësie baritore", "dashurie për Kishën" dhe "vëllazërie katolike", Patriarku Douayhy e jetoi misionin e tij në krye të Kishës Maronite për më shumë se tri dekada, në vite shumë të vështira për shkak të mospajtimit nga brenda e persekutimit nga jashtë. Nuk e pati "asnjë ditë të vetme të qetë" - shtoi Semeraro - "aq shpesh u detyrua të largohej nga selia patriarkale për të gjetur strehim në vende më të sigurta, gjithnjë në kushte të vështira".
Intelektual i vëmendshëm ndaj të varfërve
I angazhuar në veprimtari intelektuale intensive gjatë gjithë jetës së tij e i përkushtuar për të ndihmuar më të varfërit, Patriarku maronit imitoi- vazhdoi kremtuesi - “figurën e Bariut të mirë të Ungjillit, që ka Jezusin model dhe pikë referimi”. Nuk ishte thjesht bari - nënvizoi - "por tejet i mirë". Jo si barinjtë e përmendur nga Ezekieli profet, "të cilët në vend që t’i kullosin delet e tyre, kullosin vetveten".
I Lumi Douayhy dinte të ishte edhe i matur e diplomatik. Dëshmi për këtë është letra që Patriarku i pati drejtuar mbretit të Francës, Luigjit XIV, kujtoi Kardinali - në të cilën përshkruan të gjitha vuajtjet e njerëzve të tij dhe i kërkon t’i marrë nën mbrojtje”, gjë që dëshmon ndjeshmërinë dhe përvujtërinë e tij të jashtëzakonshme”, një tjetërt virtyt, që e bëri të Lum!
