Nikaragua, arrestohet rektori i Seminarit të Matagalpës

R.SH. – Vatikan

         Një tjetër meshtar u arrestua më 5 gusht, në dioqezën e Matagalpës, në Nikaragua. Rektori i Seminarit të Madh të Filozofisë kushtuar shën Luigj Gonzagës, njëkohësisht famullitar i kishës së Zojës së Guadalupes, Át Jarvin Tórrez, u dërgua në burg: kështu deklaruan për mediat besimtarët e famullisë. Arrestimi i tij u denoncua nga aktivistë dhe organizata në mbrojtje të të drejtave të njeriut në vend në gazetën kombëtare “La prensa”, nga e cila mësohet se në paraburgim ndodhet edhe bashkëpunëtorja laike e një famullie në Sébaco, Lesbia Rayo Balmaceda.

Brenda një jave, në Nikaragua janë arrestuar 13 meshtarë, që i përkasin kryesisht dioqezës së Matagalpës, ipeshkvi i së cilës, imzot Rolando Álvarez, u dëbua nga vendi më 14 janar, pasi ishte dënuar me 26 vite burgim, bashkë me ipeshkvij të tjerë. Presidenti Ortega e akuzon Kishën se i përdor ipeshkvijtë për të organizuar një grusht shteti në vend. Në mars 2023, Republika e Nikaraguas i kërkoi Selisë së Shenjtë të mbyllte zyrat e saj diplomatike, gjithsesi, pa i ndërprerë plotësisht marrëdhëniet.