Kongresi Ndërkombëtar Eukaristik në Kuito: vëllezër në një botë plot dhunë

R.SH. / Vatikan

Delegacione nga të gjitha kontinentet mbërritën në Kuito, Ekuador, për të marrë pjesë në kremtimin solemn Eukaristik në parkun e Dyqindvjetorit, i cili hapi zyrtarisht punimet e Kongresit të 53-të Ndërkombëtar Eukaristik, me temë "Vëllazëria për të shëruar botën".

Mesha u kryesua nga kryeipeshkvi metropolitan i Kuitos dhe Primati i Kishës së Ekuadorit, Imzot Alfredo José Espinoza Mateus, në bashkëkremtim me Kardinalin Baltazar Porras Cardozo, Legat papnor, dhjetëra ipeshkvij ekuadorianë e nga jashtë, dhe shumë meshtarë e rregulltarë.

Më shumë se 1600 fëmijë nga kryedioqeza e Kuitos morën Kungimin e tyre të parë dhe rreth 25 mijë besimtarë mbushën hapësirën e parkut të Dyqindvjetorit. Për Imzot Espinoza Mateus, "Quito, 'Fytyra e Vogël e Zotit' siç e quajmë me dashuri, do të jetë një vend takimi për të gjitha kontinentet, mbledhur për të reflektuar dhe përjetuar misterin e madh të Eukaristisë".

Imzot Espinoza Mateus shtoi se Eukaristia “na sfidon të jemi ndërtues të vërtetë të vëllazërisë për të 'shëruar plagët e botës' dhe na fton të jemi vëllezër autentikë në mesin e një bote plot dhunë, vdekje, luftëra; të një bote që ndan, jo të një bote që bashkon; të një bote që e shndërron njeriun në armik dhe jo në vëlla”.

Duke iu drejtuar fëmijëve që morën Kungimin e Parë, kryeipeshkvi shtoi: "Sot është një ditë feste, një ditë e madhe në jetën tuaj" dhe u kujtoi atyre fjalët e Papës Françesku që thotë: "Kungimi i Parë është mbi të gjitha një festë në të cilën kremtojmë faktin që Jezusi gjithmonë deshi të ishte pranë nesh dhe se ai kurrë nuk do të ndahet nga ne".