Papa: qeveritë t’i kundërvihen pedopornografisë. Është si mafia

R.SH. - Vatikan

Grupet përgjegjëse për prodhimin e materialeve pornografike “sillen si mafiet, që fshihen e mbrohen”, e “qeveritë duhet të marrin sa më shpejt masa “kundër këtij fenomeni”. Këtë pohon Papa në një intervistë dhënë  Caroline Pigozzi për revistën franceze Paris Match, duke e quajtur njëheresh shkandullin e abuzimeve në Kishë “turp”!

Lufta kundër Covid në favor të më të varfërve

Pyetjes se çfarë mund të bëjë Kisha që lufta kundër Covid të mos shkojë në dobi të disave, siç janë, për shembull, ndërmarrjet farmaceutike që prodhojnë vaksinat, Françesku i përgjigjet duke përshkruar punën e suksesshme të Komisionit vatikanas, krijuar në gjirin e Dikasterit për Shërbimin e Zhvillimit të Gjithanshëm Njerëzor, që ka aktivizuar Kishat dhe institucionet e vullnetariatit, në aksione konkrete në luftën kundër pandemisë, në terren.

Disa nga sfidat, në vijim

Papa kujton edhe projektet e ardhshme, “sfidat  e reja”,  për të cilat duhen bërë përgatitje, reformën e Kuries. “Që nga zgjedhja ime në fronin e Shën Pjetrit, u përpoqa të vë në jetë atë që kërkuan kardinajtë gjatë takimeve para konklavit - kujton - Por jo gjithçka është realizuar deri më sot”.

Atë i Shenjtë, po me shëndet, si jeni?

Nuk mungoi as pyetja mbi shëndetin, ndonjë muaj pas operacionit të bërë në Gemelli: “Jam fare mirë - u përgjigj Papa - kaloj një jetë normale e mund të punoj me ritmin e mëparshëm”.

Intervista, në libraritë më 18 nëntorin e ardhshëm, botohet në librin “Pourquoi eux”(Pse ata), shtypur nga Shtëpia Botuese Plon. Në të Caroline Pigozzi kujton takimet e saj me Papët, krerët e Shtetit e personalitetet e tjera.