Dita Botërore e të Sëmurit, Papa: të sigurojmë kura për të gjithë

R.SH. – Vatikan

Papa Françesku u drejtohet “të sëmurëve të dashur” dhe gjithë atyre, që punojnë në frontin shëndetësor e shpirtëror, krah tyre, vetëm 48 orë para Ditës Botërore të të Sëmurit, që Kisha e kremton më 11 shkurt. Në audiencën e përgjithshme, në Sallën Pali VI, në Vatikan, Ati i Shenjtë lutet e uron:

“Të gjithëve t’u sigurohen kurat shëndetësore dhe shoqërimi shpirtëror. Të lutemi për këta vëllezër e motra, për familjarët e tyre, për punonjësit shëndetësorë dhe baritorë e për të gjithë ata, që kujdesen për të sëmurët”.

Sot, ashtu si në mesazhin për këtë Ditë, e 30-ta kushtuar të sëmurëve, Papa Françesku vë në dukje drejtimin e trefishtë, nëpër të cilin kalon kujdesi për njerëzit, që vuajnë. Këshillon të dëgjohen, të tregohet kujdes e mëshirë për ta nga ana e punonjësve shëndetësorë, megjithëse kjo shpesh nuk është e lehtë.

Në të sëmurët, prania e Krishtit

 Pikërisht më 11 shkurt, në spitalin e Zojës së Dhimbshme në Casoria të Napolit, do të fillojë “Sinodi në repart”, organizuar nga rregulltarët kamilianë për të reflektuar, për t’u lutur e për të dëgjuar dhimbjen e shpresat e të sëmurëve, me sigurinë se vdekja nuk e ka fjalën e fundit. Drejtori i Zyrës së Komunikimit shoqëror të kamilianëve dhe i vetë spitalit të Casoria-s, fratel Carlo Mangione, nënvizon në mikrofonin e Vatican News se Dita Botërore e 11 shkurtit na ndihmon të kuptojmë që të sëmurët përfaqësojnë praninë e gjallë të Jezu Krishtit mes nesh, ndërsa kujdesi për ta, udhën e shenjtërimit për secilin prej nesh. Ta dëgjojmë…

Dita Botërore e të Sëmurit është si të ndezësh dritat mbi pasurinë më të çmuar të Kishës: të sëmurët e të vuajturit. Kisha përkujton se i do këta vëllezër, siç ndodh në një familje. Shën Kamili i quante të sëmurët “zotërinjtë dhe padronët tanë”. I sëmuri na kujton thelbin e jetës e, sidomos, na nxit të shkëputemi nga disa gjëra të kësaj bote: të dallojmë ç’është relative e ç’është absolute, duke i dhënë orientimin e vërtetë jetës, për të cilën jemi të thirrur. Nganjëherë, ka rrezik t’u japim tepër rëndësi gjërave relative e shumë më pak, atyre absolute. Këta vëllezër janë prania e Jezusit sot në histori. Krishti ka thënë: “isha i sëmurë e erdhët të më shihni”. E Sinod do të thotë të ecësh bashkë me Jezusin e pranishëm ndër të sëmurët e të varfërit.

Mesazhi i Papës Françesku për këtë Ditë, “Të jeni të mëshirshëm, ashtu siç është i mëshirshëm Ati juaj qiellor”, është nxitje për të qenë dëshmitarë të besueshëm të Ungjillit, edhe në këtë kohë pandemie…

Mesazhi i Papës Françesku na fton të jemi shenjë e mjet i mëshirës. Kur Ati i Shenjtë flet për struktura katolike, i quan bujtina të Samaritanit të Mirë. Këto vende e bëjnë Ungjillin të besueshëm dhe i japin flatra fantazisë së bamirësisë. E kemi provuar këtë gjatë pandemisë, përmes videotelefonatave, çasteve të përbashkëta në distancë me rastin e ditëlindjeve. Lidhje tejet të rëndësishme, për t’u dhënë mundësinë të sëmurëve të kenë kontakte me familjarët. Shën Kamili donte të kishte 100 krahë për të lehtësuar dhimbjet e shumë vëllezërve të sëmurë. Punonjësit shëndetësorë kanë qenë e janë në çdo çast nëpër reparte pikërisht ato 100 krahët e Shën Kamilit, i cili, pas më se katër shekujsh, vazhdon të na japë një mesazh e një mësim aktual.