Papa: të lutemi për Benediktin XVI: shumë i sëmurë, e mbështet Kishën në heshtje

R.SH. / Vatikan

Ndërmjet përshëndetjeve drejtuar besimtarëve italianë në Sallën Pali VI, në përfundim të audiencës së përgjithshme, duke u shkëputur nga teksti i shkruar, Françesku u kërkoi besimtarëve të pranishëm një ndjet shumë të posaçëm: "Një lutje të veçantë për Papën e Nderit Benedikti, që po mbështet Kishën në heshtje të plotë”. "Është shumë i sëmurë. Kujtojeni! - tha Papa - duke i kërkuar Zotit ta ngushëllojë dhe ta mbështesë në dëshminë e dashurisë për Kishën, deri në fund të fundit”.

Në Mater Ecclesiae

Papa Françesku u ndaluan me pak fjalë, tek gjendja e rëndë shëndetësore e Benediktit, i cili më 16 prillin e kaluar mbushi 95 vjeç. Joseph Ratzinger, prej disa muajsh pas heqjes dorë nga papnia, në shkurt 2013, vazhdon të jetojë në Manastirin Mater Ecclesiae, në Kopshtet e Vatikanit. I ndihmuar nga Memores Domini, gra kushtuar shërbimeve të kësaj natyre, dhe nga sekretari i tij personal, Imzot Georg Gänswein, vitet e fundit i ka kaluar me lutje, muzikë, studim dhe lexim.

Lidhja e Françeskut me Benediktin

Françesku ka folur në një mori rastesh për lidhjen me paraardhësin e tij, të cilin në Engjëllin e 29 qershorit 2021, përvjetor i shtatëdhjetë i shugurimit meshtarak të Ratzinger-it, e quajti "baba" dhe "vëlla". Që nga fillimi i papnisë së tij, Papa Françesku nisi 'traditën' e takimit me Papën e Nderit, duke filluar me vizitën e parë historike. Kur sapo qe zgjedhur, mbërriti me helikopter në selinë e  Castel Gandolfos, ku strehohej Benedikti disa javë përpara se të shpërngulej në Vatikan. Për vizitë në ditët solemne të Krishtlindjeve, të Pashkëve ose me rastin e Koncistoreve me kardinajtë e rinj, Françesku nuk e harroi kurrë gjestin e afërsisë dhe të mirësjelljes: ishte gjithnjë i pranishëm në Manastirin e Vatikanit për urime dhe përshëndetje të përzemërta.

Ndërkohë, ftesa e Papës Françeskut për lutje – e bërë sërish edhe përmes Twitter-it – u pranua një zëri nga besimtarët dhe personalitetet kishtare në vendlindjen e tij në Gjermani dhe kudo në
botë.