Spei satelles: sot, fjalët e Papës përshkojnë kozmosin
R.SH. – Vatikan
Një fjalë shprese mund të jetë tejet e shkurtër, por mund të arrijë këdo dhe kudo, madje edhe në hapësirë. Kështu ndodhi dje në mesditë (me orën evropiane), kur fjalët e Papës, që ngushëlluan njerëzimin gjatë pandemisë, shqiptuar në vetmi nga Françesku në Sheshin e Shën Pjetrit të lagur nga shiu, më 27 mars 2020, u nisën në orbitë rreth tokës nga baza kozmike Vandenberg e Kalifornisë, në formën e një nanolibri, transportuar nga një satelit.
Punë skuadre
Spei Satelles, "rojtari i shpresës": kështu quhet misioni kozmik, promovuar nga Dikasteri vatikanas për Komunikimin, koordinuar nga Agjencia Italiane Kozmike, në bashkëpunim me Qendrën Kombëtare Kërkimore (CNR), e cila krijoi nanolibrin, me Politeknikumin e Torinos, që ndërtoi satelitin dhe me studentët e Institutit Universitar Salezian të Venedikut (IUSVE), të cilët realizuan logon e kësaj ngjarjeje. Koordinimi baritor dhe kulturor iu besua apostullimit dixhital të Torinos.
Fjalët e Papës në pak milimetra
Nanolibri është një pllakë e vogël silikoni afërsisht dy me dy milimetra, e cila ka të gdhendur në kod binar mesazhin dhe pamjet e Papës në Statio Orbis të vitit 2020. Kodi binar s’është tjetër veçse mjeti për “përkthimin” në gjuhën dixhitale të fjalëve të Atit të Shenjtë. Ndërkaq, Cubesat 3U, sateliti i projektuar nga Politeknikumi i Torinos, është një paralelopiped me përmasa 34x10x10 centimetra dhe me peshë gati tre kilogramë. Jashtë mbulohet me panele diellore për furnizimin me energji elektrike, ndërsa brenda, përveç nanolibrit, ka dy kompjuterë, një bateri, sensorë për matje, magnetë të vegjël për stabilizim dhe dy sisteme komunikimi me frekuencë ultra të lartë UHF. Këta të fundit do të transmetojnë, përmes dy antenave, mesazhet e shpresës së Papës Françesku, të cilat mund të kapen nga radioamatorët e gjithë botës. Sateliti rrotullohet rreth Tokës në një lartësi prej 525 kilometrash. Emri i atyre, që do të regjistrohen në faqen zyrtare të Spei Satelles, për të dhënë një mesazh shprese dhe vëllazërimi për të gjithë, do të mbetet në një mikroçip shtesë të satelitit.
Gjest vëllazërimi dhe shprese
I gjithë misioni, thuhet në faqen zyrtare të Spei Satelles është "gjest i fuqishëm, universal, gjithëpërfshirës, që i bën thirrje njerëzimit për shpresë dhe për nevojën e veprimeve konkrete, materiale e shpirtërore si ai i Papës në atë shesh bosh”. Është gjithashtu dëshmi për faktin se sa frytdhënëse mund të jenë marrëdhëniet ndërmjet shkencës, teknologjisë dhe fesë, e sa gjithpërfshirëse mund të bëhen, duke pasur parasysh sidomos numrin e të rinjve, të cilët bashkëpunuan idelisht me Papën në këtë projekt. Misioni i përgjigjet edhe “nevojës, në këto kohë lufte, për një thirrje të fuqishme në favor të paqes, vëllazërimit e bashkëpunimit”. Është “teknologji simbolike, që kthehet në farë shprese”.
