Papa në Bazilikën e Zojës së Madhe ia beson Shën Marisë udhëtimin në Marsejë
R.SH. – Vatikan
Tri ditë para nisjes së tij për në Marsejë, Papa Françesku shkoi paraditen e sotme, 19 shtator, në Bazilikën e Zojës së Madhe, në Romë, për t'ia besuar shtegtimin e tij të 44-të apostolik ndërmjetësimit të Shën Marisë Salus Populi Romani. Ati i Shenjtë, njofton Salla e Shtypit e Vatikanit, si zakonisht, u ndal në lutje" përpara ikonës mariane, "duke ia besuar asaj udhëtimin e tij të ardhshëm në Marsejë. Në fund u kthye në Vatikan".
Në Marsejë, më 22 e më 23 shtator
Është hera e 113-të, që Papa shkon tek Zoja, e cila nderohet si pajtore e banorëve të kryeqytetit italian, duke konfirmuar kështu, përkushtimin e tij, shprehur që nga fillimi i papnisë. Françesku do të udhëtojë për në Marsejë më 22 dhe 23 shtator, me rastin e "Rencontres Méditerranéennes", takimeve mesdhetare të organizuara nga kryedioqeza e qytetit bregdetar francez, të cilat kanë filluar të dielën, më 17 shtator e do të përfundojnë në datën 24. Kjo nismë vjen pas dy takimeve të tjera të reflektimit e të përshpirtërisë, me titull "Mesdheu, kufi i paqes", që u mbajtën fillimisht në Bari, më 2020 dhe më pas në Firence, më 2022.
Rast për të reflektuar mbi fenomenin e migracionit
Në Engjëllin e fundit të Tënzot, Ipeshkvi i Romës i kërkoi popullit të Zotit ta shoqërojë me lutje gjatë këtij shtegtimi në qytetin jugor të Francës, i mbiquajtur "port i shpresës" për migrantët, që mbërrijnë këtu sidomos nga Afrika. “Nismë e bukur – pohoi Papa, duke folur për Takimet Mesdhetare – që zhvillohet në qytete të rëndësishme të Mesdheut, duke bashkuar liderët kishtarë dhe civilë për të promovuar rrugët e paqes, bashkëpunimit dhe integrimit rreth “mare nostrum”, me vëmendje të veçantë ndaj fenomenit migrator”. Ky i fundit, theksoi Papa, është “sfidë jo e lehtë, siç e shohim edhe nga lajmet e ditëve të fundit, por duhet përballuar së bashku, pasi është themelor për të ardhmen e të gjithëve, e cila do të jetë e begatë. vetëm nëse ndërtohet mbi vëllazërimin, duke vënë në plan të parë dinjitetin njerëzor, njerëzit konkretë, veçanërisht ata më nevojtarët”.
