Françesku: drejt Krishtlindjes të bëjmë hapa konkrete për paqen
R. SH. Vatikan
“Po shkojmë drejt Krishtlindjes: a do të jemi në gjendje, me ndihmën e Zotit, të bëjmë hapa konkrete drejt paqes?”. Këtë ua kërkoi Papa Françesku besimtarëve të mbledhur në Sheshin e Shën Pjetrit për lutjen e Engjëllit. "Nuk është e lehtë, ne e dimë këtë" - kujtoi - sepse "disa konflikte kanë rrënjë të thella historike". Megjithatë, shpresa vjen nga dëshmia e atyre të cilët në konfliktet e shumta që po gjakosin botën, “punuan me urti dhe durim për bashkëjetesën paqësore.
“Ndiqni shembullin e tyre! Duhet bërë çdo përpjekje për t’i përballuar dhe për t’i zhdukur shkaqet e konflikteve”.
Mendime për Ukrainën, Palestinën dhe Izraelin
Në Ditën Botërore të të Drejtave të Njeriut që kremtohet sot, Françesku nuk harroi Ukrainën, Palestinën, Izraelin e martirizuar:
“Të mbrohen civilët, spitalet dhe vendet e kultit, të lirohen pengjet e të garantohet ndihma humanitare”.
Shpresë për paqen në Kaukaz
Mendimi i Papës shkoi më pas në shkëmbimin e të burgosurve ndërmjet Armenisë dhe Azerbajxhanit, gjë që çoi në lirimin e një numri të konsiderueshëm të burgosurish - burimet e Bakusë flasin për 32 ushtarë armenë në këmbim të dy ushtarëve azerbajxhanë - në kontekstin e krizës që po prek Nagornin-Karabak:
“E shikoj me shpresë të madhe këtë shenjë pozitive për marrëdhëniet ndërmjet Armenisë dhe Azerbajxhanit, për paqen në Kaukazin Jugor dhe i inkurajoj palët dhe liderët e tyre ta përfundojnë sa më shpejt të jetë e mundur Traktatin e Paqes”.
Një lutje për COP28, që të arrijë "rezultate të mira"
“Pas pak ditësh”, kujtoi Papa, “puna e COP 28 për klimën, që vijon në Dubai, do të përfundojë”. Ndaj na kujton “të lutemi që të arrihen rezultate të mira për kujdesin e shtëpisë sonë të përbashkët dhe mbrojtjen e popullatës”.
Së fundi, Françesku siguron se lutet për tri viktimat e zjarrit që ra në spitalin e Shën Gjonit Ungjilltar, në Tivoli.
