Martin Scorsese në audiencën e Papës. Regjisori po përgatit një film mbi Jezu Krishtin
R.SH. – Vatikan
Ndërmjet të pranishmëve në Sallën Pali VI në Vatikan, për audiencën e përgjithshme të Papës Françesku, ishte sot edhe regjisori amerikan Martin Scorsese. "Dialogu ndërmjet Martin Scorsese dhe Papës Françesku vazhdon. Dy njerëz gjenialë dhe me përvojë, për të cilët figura e Jezusit ka bukuri dhe vlerë të jashtëzakonshme", komenton në platformën X, Át Antonio Spadaro, zv.sekretar i Dikasterit për Kulturën dhe Edukimin.
Pas suksesit të filmit të tij të fundit “Killers of the flower moon”, regjisori po përgatit një film të bazuar në romanin “Jeta e Jezusit”, botuar në vitin 1973 nga shkrimtari japonez Shasaku Endo, i cili vdiq në vitin 1996, në moshën 73-vjeçare. Nuk është hera e parë, që regjisori i mirënjohur përdor romanet e tij. “Silence” (Heshtja) është tjetër vepër e Shasaku Endo, shkruar më 1966, që u kthye në një film historik nga Martin Scorsese në vitin 2016, me aktorët Andrew Garfield dhe Adam Driver.
Frymëzimi për filmin e ri, kushtuar Krishtit, i erdhi pikërisht pas një takimi me Papën, vitin e kaluar, si edhe pas pjesëmarrjes së tij në konferencën me temë “Estetika globale e imagjinatës katolike”, organizuar në maj nga revista e jezuitëve “La Civiltà Cattolica” në bashkëpunim me Universitetin Georgetown. Në takim morën pjesë rreth dyzet poetë, tregimtarë, skenaristë dhe regjisorë nga e gjithë bota.
Gjithnjë për temën e jetës së Krishtit, kujtojmë se Scorsese pati folur me admirim për filmin e regjisorit italian Pier Paolo Pasolini, “Ungjilli sipas Mateut”, pati saktësuar domethënien, që deshi t’i jepte filmit “Tundimi i fundit i Krishtit”, realizuar prej tij më 1988 dhe pati vënë në dukje hapin tjetër në punën e tij kërkimore mbi figurën e Jezusit gjatë realizimit të filmit “Silence” (Heshtja). Argument, që e ka munduar gjithmonë.
