Papa, tregu dhe fitimi gllabërojnë të rinjtë, kemi nevojë për drejtësi

R.SH. - Vatikan

“Zotat e Tregut dhe të Fitimit janë hyjni të rreme që na çojnë drejt dehumanizimit dhe shkatërrimit të planetit. Historia e ka treguar këtë në shumë raste, madje në raste shumë të trishtueshme. Unë jam një Moloch që gllabëron brezat e sapolindur”. Kështu pohon Papa Françesku në një video-mesazh në spanjisht drejtuar anëtarëve të Komitetit Pan-Amerikan të gjyqtarëve për të drejtat sociale dhe doktrinën françeskane në Argjentinë (Copaju), me rastin e inaugurimit të selisë në Buenos Ajres.

Shteti është më i rëndësishëm se kurrë

Roli i ligjit dhe operatorëve të tij: avokatë, gjyqtarë, prokurorë publikë, mbrojtës është themelor dhe vendimtar, nënvizon Papa Françesku në videomesazh. “Pushteti gjyqësor”, pra, “është mjeti i fundit që ka shteti për të korrigjuar shkeljet e të drejtave dhe për të ruajtur ekuilibrin institucional e social”. Në fakt, sot jemi në një botë me padrejtësi e pabarazi të thella sociale, në të cilën miliona fëmijë "çdo ditë hanë vetëm mbeturinat e atyre që konsumojnë". “Të drejtat sociale nuk janë falas, nuk janë të lira. Pasuria e mundësia për t'i mbështetur ato ekziston, por duhen vendime politike adekuate, racionale dhe të drejta. Shteti, sot më i rëndësishëm se kurrë, është i thirrur të ushtrojë këtë rol qendror të rishpërndarjes dhe drejtësisë sociale”.

Vendosmëria dhe vendimi kundër modeleve çnjerëzore dhe të dhunshme

Për Papën nuk bëhet fjalë për rregulla, ato tashmë ekzistojnë, pra, janë të pranishme në shoqëri, por duhet zbatimi i tyre efektiv. Këtu hyn në lojë roli i punonjësve të drejtësisë. Në këtë kuptim, kujton Papa, "fjala e Jezusit mbi të cilën bazohet doktrina shoqërore e Kishës është një udhë e sigurt dhe e ndritshme për të kontribuar në ushtrimin e gjyqësorit". Së fundi, për këdo që ka pushtet publik, nuk është i mjaftueshëm legjitimiteti origjinal nga i cili buron ai pushtet, por edhe “ushtrimi duhet të jetë gjithashtu legjitim”, i cili nuk mund të distancohet nga ndërtimi i “shoqërive të drejta dhe dinjitoze”. “Paqja është një ndërtim i përditshëm dhe ju jeni punëtorë të Paqes”, përfundon Ati i Shenjtë Bergoglio videomesazhin, duke kërkuar “qëndrueshmëri dhe vendim përballë modeleve çnjerëzore dhe të dhunshme”.