Papa, Shkollave për Paqen: "Të jeni protagonistë, jo spektatorë të së ardhmes"
R.SH. / Vatikan
“Jeni të thirrur për të qenë protagonistë, e jo spektatorë, të së ardhmes”. Kjo, ftesa e Papës për 6000 fëmijët që mbushën sot Sallën Pali VI, në Vatikan, ardhur nga 94 qytete të 18 rajoneve të ndryshme italiane, si përfaqësues të 137 "Shkollavepër Paqen". Faleminderit për këtë rrugëtim plot ide, nisma, kurse formimi dhe aktivitete, që synojnë krijimin e një vizioni të ri të botës” - këto fjalët e përshëndetjes së Françeskut, drejtuar 6000 fëmijëve:
“Faleminderit që jeni plot entuziazëm në ndjekjen e qëllimeve të së bukurës dhe të mirësisë, në mes situatave dramatike, padrejtësive dhe dhunës që shpërfytyrojnë dinjitetin njerëzor. Faleminderit, sepse me pasion dhe bujari impenjoheni të punoni në kantierin e së ardhmes, duke e mundur tundimin e strukjes së jetës vetëm tek e sotmja, gjë që ju rrezikon të humbisni aftësinë për të ëndërruar punë të mëdha”.
“Sot, më shumë se kurrë - vijoi Papa Françesku - ndjehet nevoja për të jetuar me përgjegjësi, duke zgjeruar horizontet tona, duke shikuar përpara dhe duke mbjellë dita-ditës ato fara paqeje, që nesër do të mund të mbijnë dhe të japin fryte”.
Samiti i së Ardhmes
Në vijim Ati i Shenjtë Bergoglio kujtoi se në shtator, në Nju Jork, do të mblidhet Samiti i së Ardhmes, i thirrur nga OKB-ja për të përballuar sfidat e mëdha globale të këtij çasti historik dhe për të nënshkruar "Paktin për të Ardhmen" si dhe "Deklaratën për brezat e ardhshëm". “Është ngjarje e rëndësishme - vijoi- e duhet edhe kontributi juaj, që të mos mbetet vetëm në letër, por të bëhet konkrete dhe të arrihet përmes rrugëve dhe veprimeve të ndryshimit”- kujtoi Françesku:
“Paqja nuk është vetëm heshtja e armëve dhe mungesa e luftës; është klimë dashamirësie, besimi dhe dashurie, që mund të krijohet në një shoqëri të bazuar mbi marrëdhënie kujdesi, në të cilën individualizmi, shpërqendrimi dhe indiferenca i lëshojnë vendin aftësisë për t'u kushtuar vëmendje të tjerëve, për t'i dëgjuar në nevojat e tyre themelore, për t’u shëruar plagët, për të qenë për ta, mjete dhembshurie dhe shërimi”.
Këtë ua shpjegoi Papa 6 mijë fëmijëve të “Shkollave për paqen”, që sot mbushën përplot Sallën Pali VI, në Vatikan:
“Ky është kujdesi që Jezusi ka për njerëzimin, veçanërisht për më të brishtët, për të cilin shpeshherë na flet Ungjilli” - vazhdoi Françesku - sipas të cilit nga “kujdesi” për njëri-tjetrin “lind një shoqëri gjithëpërfshirëse, e themeluar mbi paqen dhe dialogun”.
Thirrje dhe urime: jini artizanë të paqes!
Në këtë kohë, kur vijon ende lufta, ju kërkoj të jeni artizanë të paqes” - kjo ishte ftesa përfundimtare:
“Në një shoqëri ende të burgosur të kulturës së hedhurinës, ju kërkoj të jeni protagonistë të përfshirjes; në një botë të përshkuar nga kriza globale, ju kërkoj të jeni ndërtues të së ardhmes, në mënyrë që shtëpia jonë e përbashkët të bëhet vend vëllazërimi, solidariteti dhe paqeje. Ju uroj të jeni gjithmonë të apasionuar pas kësaj ëndrre!”.
Mendoni për fëmijët ukrainas, që kanë harruar të buzëqeshin!
Mendoni për fëmijët e Ukrainës dhe të Gazës, të cilët vuajnë nën mitralozët” - i ftoi Papa të pranishmit - “Mendoni për fëmijët që janë në luftë! Që kanë harruar të buzëqeshin” - vazhdoi Françesku duke folur lirisht:
“Lutuni për këta fëmijë, strehojini në zemrën tuaj fëmijët, që janë në luftë. Mendoni për fëmijët e Gazës, të mitralizuar, të uritur. Mendoni për fëmijët”.
Më pas, Ati i Shenjtë u bëri thirrje të pranishmëve për një çast të vogël heshtjeje, duke e ftuar secilin të mendojë për fëmijët ukrainas dhe fëmijët e Gazës:
“Duhet kujdes për fëmijët ukrainas, që harrojnë të buzëqeshin”, ishte ftesa e fundit: “Dhe fëmijët e Gazës, që vuajnë nën mitralozët”.
