Papa shkon në një famulli romake për të takuar 200 fëmijë

R.SH. – Vatikan

Papa Françesku, në dialog me 200 fëmijë të famullisë romake të shën Gjon Maria Vianejt. Siç njoftoi Salla e Shtypit e Selisë së Shenjtë, sot pasdite, në këtë famulli të lagjes Borghesiana, Papa Françesku u lut së bashku me “fëmijët e katekizmit, në takimin e parë të 'Shkollës së Lutjes', e cila fillon gjatë këtij Viti të Lutjes, në përgatitje për Jubileun 2025”.

Në bisedë të lirë me fëmijët dhe me të pranishmit, Papa vuri në dukje tri fjalë të rëndësishme për jetën e secilit “faleminderit, të lutem dhe më fal”, foli për rëndësinë e lutjes dhe i këshilloi të gjithë ta falenderojnë Zotin për ushqimin e përditshëm. “A e dini se ka fëmijë, që s’kanë të hanë?” u kujtoi ai vogëlushëve të katekizmit. Papa u lut së bashku me ta, duke e falënderuar Zotin për dhuratën e jetës së secilit, për prindërit, për dashurinë e Tij për ta e për Krijimin, duke premtuar impenjim në ruajtjen e tij. Falënderuan së bashku Hyjin edhe për Jezu Krishtin, vëlla e mik, që u ka mësuar të gjithëve si t’i drejtohen Atit Qiellor e si t’i trajtojnë të tjerët; falënderuan Shpirtin Shenjt e krejt Trininë, që me dashuri u tregon udhën në jetë.

Në traditën e të Premteve të Mëshirës, gjatë këtij viti, shpallur nga vetë Françesku si Viti i Lutjes në përgatitje për Jubileun 2025, Ati i Shenjtë do të mbajë një shkollë lutjeje. Njoftimin e pati dhënë që në janar imzot Rino Fisichella, pro-prefekt i Dikasterit për Ungjillëzimin, gjatë një konference për shtyp në Vatikan.

Siç shpjegoi ai, Papa do të takojë “kategori të caktuara njerëzish, për t’u lutur dhe për të kuptuar së bashku format e ndryshme të lutjes, si lutja e ndërmjetësimit, e adhurimit, e përgjërimit”. “Jam i sigurt se ipeshkvijtë, meshtarët, diakonët dhe katekistët do të gjejnë në këtë Vit mënyrat më të përshtatshme për ta bërë lutjen bazë për shpresën, që synon të përhapë Jubileu i vitit 2025 në këtë kohë të trazuar”, nënvizoi atëherë imzot Fisichella, duke njoftuar gjithashtu se Ati i Shenjtë do ta publikojë Bulën për shpalljen e Jubileut më 9 maj.