Papa Françesku në Belgjikë e në Luksemburg, shtatorin e ardhshëm

R. SH. - Vatikan

Muaji shtator, i cili do të hapet me shtegtimin e madh në Indonezi, Papua Guinea e Re, Timor-Leste dhe Singapor, do të përfundojë me një tjetër udhëtim ndërkombëtar për Papën Françesku: Belgjikë dhe Luksemburg. Salla e Shtypit e Vatikanit e konfirmoi vizitën e Papës në dy vendet evropiane nga 26 deri më 29 shtator.

“Duke mirëpritur ftesën e Krerëve përkatës të Shteteve dhe autoriteteve kishtare, Ati i Shenjtë Françesku do të bëjë një shtegtim apostolik në Luksemburg, më 26 shtator dhe në Belgjikë, nga data 26 deri më 29 shtator: në Bruksel, Leuven dhe Louvain-La-Neuve”, lexojmë në shënimin e Vatikanit, ku saktësohet: “Programi i udhëtimit do të publikohet në kohën e duhur”.

Vetë Papa foli për udhëtimin në Belgjikë gjatë një interviste me transmetuesin meksikan N+ në dhjetor 2023. Duke kujtuar shtegtimin e anuluar në Dubai për shkak të bronkitit dhe udhëtimet e mundshme në të ardhmen, Françesku shpjegoi se, ndërsa udhëtimet e tjera janë ende në studim, ai në Belgjikë është "i sigurt".