Papa, meshtarëve të moshuar të një famullie të Romës: bëhuni dëshmitarë të kujtesës
R.SH. – Vatikan
Të jeni "dëshmitarë të kujtesës", si edhe të keni guximin rinor për të ecur përpara së bashku: kjo është nxitja e Papës Françesku për rreth 70 meshtarë të dioqezës së Romës, shuguruar së paku prej 40 vjetësh, të cilët i takoi dje pasdite (14 maj) në famullinë e Shën Jozefit në Trionfale. Dialogu me dyer të mbyllura zgjati afërsisht dy orë, gjatë të cilave u trajtuan çështje baritore dhe impenjimi meshtarak e kishtar në famullitë e kryeqytetit italian.
"Kur njerëzit e ndiejnë butësinë e bariut, afrohen"
Papa nënvizoi vlerën e punës së famullitarit dhe të priftit në rrugë, rëndësinë e përdorimit të butësisë për të udhëhequr grigjën, që u ka besuar Zoti: "Kur njerëzit e ndiejnë butësinë e bariut, afrohen".
Biseda me Atin e Shenjtë përshkoi temat e mikpritjes së të tjerëve, të Sakramentit të Rrëfimit, të dëgjimit e faljes, si edhe atë të impenjimit në shenjtëroret e dioqezës. Dolën në pah disa nga vështirësitë e meshtarëve më të vjetër: vetmia, pas vitesh jetese në mesin e njerëzve; lodhja, që ndiejnë ndërsa përballojnë ndryshimin; hidhërimi, nganjëherë, për t'u kapërcyer me lutje; kujtimi i dashurisë së Zotit dhe ndjenja e bijësisë me Zojën e Bekuar. Papa Françesku nënvizoi disa herë vlerën e lidhjeve ndërmjet priftërinjve të vjetër dhe të rinj: “Le të diskutojnë… kjo është jeta… e të ecin përpara së bashku”, sepse, shtoi Ati i Shenjtë, “gjyshërit duhet të rrinë bashkë me familjen”.
Papa bekoi barkun e një gazetareje shtatzënë
Françesku mbërriti pak para orës 16.00, ndërsa ishin mbledhur për ta pritur qindra njerëz, në oborrin e kishës, por edhe në dritaret e ballkonet përreth. Përshëndeti menjëherë zëvendësin e dioqezës së Romës, imzot Baldo Reina, ipeshkvin Michele Di Tolve, delegat dioqezan i fushës së kujdesit për diakonatin, klerin dhe jetën rregulltare, si edhe famullitarin, don Tommaso Gigliola. Më pas, foli me një grup gazetarësh pas barrierave e bekoi barkun e një gazetareje shtatzënë.
Brenda famullisë, Papa u prit nga tri murgesha, të cilat e përqafuan, duke e falënderuar për emocionet, që po u dhuronte. Në një sallë të kishës, Françesku u takua me grupin e meshtarëve të moshuar: tre rreshta kokash gri, njerëz, që u ngritën në këmbë për ta duartrokitur. Ndërmjet tyre, don Antonio Ciamei, 94 vjeç, me 70 vjet shërbim meshtarak. “T’i lutemi Zojës dhe pastaj të flasim!”, u tha Papa.
U lutën së bashku, iu drejtuan Shpirtit Shenjt e, pastaj, imzot Di Tolve paraqiti shkurtimisht realitetin e famullisë së Shën Jozefit në Trionfale, për t’ia lënë vendin dialogut me dyer të mbyllura, me pyetje dhe përgjigje.
Takimi me fëmijët
Në fund, Bergoglio falënderoi për bisedën, duke i ftuar të pranishmit të mos lodhen shumë, të luten dhe të shoqërojnë kishat. Pasi i përshëndeti meshtarët një nga një, Papa u ndal në kishë me rreth 70 fëmijë, që së shpejti do të marrin Kungimin e Parë, me 100 fëmijë të tjerë nga shkolla e afërt e Shën Jozefit dhe me një grup prej rreth njëqind besimtarësh. Më pas, u kthye në Vatikan.
