PAPA

Papa reflekton mbi emrin me të cilin thirret Shpirti Shenjt në Bibël

"Liri nuk do të thotë të bësh çfarë të duash" dhe është e vërtetë kur shprehet "në atë që duket si e kundërta, shërbimi": kështu Françesku në katekizmin e audiencës së përgjithshme, mbajtur në Sheshin e Shën Pjetrit, kushtuar emrit "Ruach" me të cilin u quajt së pari Shpirti i Zotit në Bibël. Vetja e tretë e Trinisë ka emrin e erës, e cila pushton gjithçka, ndaj është i përshtatshëm për Të. Shpirti nuk mund të "institucionalizohet". I shpërndan dhuratat e tij si të dëshirojë!

R.SH. / Vatikan

"Gjëja e parë që mësojmë për një njeri, është emri i tij". Kjo vërejtje e Papës i prin katekizmit të sotëm gjatë audiencës së përgjithshme, mbajtur paradite në Vatikan. Kështu Papa Françesku, duke vazhduar ciklin e katekizmit kushtuar Shpirtit Shenjt, përpiqet të shpjegojë pse Bibla e quan Shpirt Vetjen e tretë të Trinisë . "Është varianti i latinizuar" - sqaron - por emri me të cilin njihej dhe thirrej fillimisht, ishte Ruah, "që do të thotë frymë, erë, frymëmarrje". Prej këndej, titulli i katekizmit “Era fryn ku të dojë”, me të cilin Papa nënvizon se aty ku është Shpirti i Zotit, aty është edhe liria: liria për të bërë mirë, “liria e bijve, jo e skllevërve”:

“Mos u habitni, pra, nëse ju them: ju duhet të lindni nga lart. Era fryn ku të dojë dhe ia dëgjon zërin, por nuk e di nga vjen, as ku shkon; e kështu është kush lind nga Shpirti. (Gjoni 3,6-8)”.

Emri zbulon personin

Papa Françesku shpjegon se emri është aq i rëndësishëm, sa pothuajse identifikohet me personin, që e mban:

“Nuk është kurrë emër thjesht i rastit: gjithmonë e thotë diçka për personin, zanafillën ose misionin e tij. E njëjta gjë vlen edhe për emrin Ruach. Ai përmban zbulesën e parë themelore mbi vetjen dhe funksionin e Shpirtit Shenjt”.

Fuqia dhe liria e Shpirtit në figurën e erës

Por çfarë kuptimi ka fjala Ruah - pyet Papa. - Figura e erës, që përsëritet në Bibël, shpreh 'fuqinë' e Shpirtit, sepse "era është forcë dërrmuese dhe e paepur. E aftë për të lëvizur oqeanet". Në Besëlidhjen e Re, megjithatë, Jezusi këtij aspekti i shton edhe lirinë. Era - vëren Papa - "nuk mund të shfrytëzohet absolutisht, nuk mund të ambalazhohet, nuk mund as të konservohet". “Më kot u përpoq racionalizmi modern” ta bëjë këtë. Po rezultati qe “humbja e tij, anulimi ose reduktimi në shpirtin e pastër dhe të thjeshtë njerëzor”:

Megjithatë, një tundim i ngjashëm nuk mungon as në fushën kishtare, e është dëshira për ta mbyllur Shpirtin Shenjt në kanone, institucione, përkufizime. Është Shpirti ai, që i krijon dhe i gjallëron institucionet, por që nuk mund të "institucionalizohet". Era fryn "ku të dojë", kështu edhe Shpirti i shpërndan dhuratat e tij "ku e si të dojë"

Liria është zgjedhja për të bërë mirë

Elementi i lirisë, i lidhur me Shpirtin e Zotit, është shumë i pranishëm te Shën Pali - vazhdoi Papa Françesku - por kjo liri nuk është ashtu si mendohet zakonisht. Nuk është "të bësh çfarë të duash", nuk do të thotë të jesh i lirë të bësh mirë apo keq. Do të thotë "liri për të bërë mirë dhe për ta bërë lirisht". Është "liri e bijve, jo e skllevërve". Pali Apostull u shkruan Galatasve se liria nuk duhet të jetë "justifikim për mishin"! Liria e vërtetë është në kundërshtim me egoizmin dhe shprehet në shërbim. E Papa vazhdon:

“E dimë mirë kur kjo liri bëhet “pretekst për mishin”. Pali bën një listë gjithnjë aktuale: "kurvëria, papastërtia, shthurja, idhujtaria, magjia, armiqësitë, grindjet, xhelozia, mosmarrëveshjet, përçarjet, fraksionet, zilia, dehja, orgjitë dhe gjëra të tjera të tilla". Por është edhe liria, që i lejon të pasurit të shfrytëzojnë të varfërit! Liri e shëmtuar, kjo, që e lejon të fortin të shfrytëzojë të ligshtin dhe të gjithë, të shfrytëzojnë mjedisin, pa u ndëshkuar. Është një liri e shëmtuar, nuk është liria e Shpirtit”.

Falë Shpirtit, jemi të lirë për të shërbyer

Papa citoi fjalët e Jezusit, shkëputur nga Shën Gjoni ungjilltar: "Nëse Biri do t’ju bëjë të lirë, ju do të jeni vërtet të lirë", për të përfunduar me një ftesë:

"T’i kërkojmë Jezusit të na bëjë, nëpërmjet Shpirtit të tij Shenjt, burra dhe gra me të vërtetë të lirë! Të lirë për të shërbyer, në dashuri dhe në gëzim!”.