Lindja e Mesme, Françesku: armëpushim në të gjitha frontet

R. SH. - Vatikan

Në audiencën e përgjithshme, rifilluar pas pushimit në korrik, Papa Françesku nuk e fshehu shqetësimin e tij për situatën në Lindjen e Mesme. Ndërsa rritet frika për një sulm të mundshëm të Iranit kundër Izraelit dhe tensionet me Libanin vazhdojnë, Papa kërkoi përsëri, në fund të përshëndetjeve në italisht për shtegtarët e mbledhur në Sallën Pali VI, të marrin fund armiqësitë:

“Ripërsëris thirrjen time për të gjitha palët e përfshira, që konflikti të mos përhapet dhe zjarri të pushojë menjëherë në të gjitha frontet, duke filluar nga Gaza, ku situata humanitare është shumë e rëndë dhe e paqëndrueshme”.

Të fitojë dashuria

Papa uron që dashuria të mbizotërojë dhe armiqësitë të zgjidhen me falje:

“Lutem që kërkimi i sinqertë i paqes të shuajë mosmarrëveshjet, dashuria të mposhtë urrejtjen dhe hakmarrja të çarmatoset nga falja”.

Mbretëroftë paqja në Ukrainë, Mianmar dhe Sudan

Françesku shpreh edhe shqetësimin për Ukrainën dhe fton besimtarët të luten për vendin e Evropës Lindore e për ato kombe në luftë, ku njerëzit vazhdojnë të vuajnë, të kalojnë vështirësi dhe të provojnë dhimbje të rënda në korp e në shpirt:

“Ju kërkoj të bashkoheni në lutjen time për Ukrainën e munduar, Mianmarin, Sudanin. Këto popullsi, aq të provuara nga lufta, e gjetshin shpejt paqen e shumëdëshiruar”.

Të marrin fund diskriminimet në Pakistan e Afganistan

Së fundi, Papa - i cili këtë mëngjes priti në audiencë një delegacion nga Shoqata e Bashkësisë Afgane në Itali - na kërkon të lutemi edhe për Pakistanin dhe Afganistanin, ku vijon diskriminimi.

T’i bashkojmë përpjekjet dhe lutjet tona për të zhdukur diskriminimin etnik në rajonet e Pakistanit dhe Afganistanit, veçanërisht diskriminimin kundër grave.