Françesku: ndërmjet të shkurajuarve, të krishterët të dëshmojnë mëshirën e Zotit
R. SH. - Vatikan
Bëhuni misionarë të dashurisë së Krishtit: ky, inkurajimi që Papa Françesku u jep pjesëmarrësve të Kongresit Kombëtar Eukaristik në Antsiranana-Madagaskar nga data 23 deri më 25 gusht. Në mesazhin drejtuar kryetarit të Konferencës Ipeshkvnore, Imzot Marie Fabien Raharilamboniaina, Papa nënvizon se takimi, i organizuar me synimin që t'i rikthejë besimtarët "në problemet themelore, duke i ndihmuar të rizbulojnë kuptimin e adhurimit eukaristik, dëshirën për ta kaluar kohën me Krishtin”, dhe në synimin që të rriten si të krishterë, merr një vlerë të veçantë kur përgatitet për përfundimin e Sinodit mbi sinodalitetin. "Ju ndihmoftë të rizbuloni rëndësinë e takimit, të lutjes dhe të angazhimit me dhe për të tjerët, në gjurmët e Jezusit në Eukaristi" - uron Papa, duke kujtuar, siç pati thënë gjatë fjalës mbajtur në Komitetin organizativ të Kongresit Kombëtar Eukaristik të SHBA, më 19 qershor 2023, se: “Eukaristia na shtyn drejt një dashurie të kushtuar fort ndaj fqinjit”.
Njëqindvjetori i Lëvizjes Eukaristike Rinore
Në vitin në të cilin kremtohet njëqindvjetori i "Lëvizjes Eukaristike të Rinisë", Françesku thekson se sot "besimi në praninë e vërtetë të Zotit është sfidë e madhe" dhe i fton anëtarët të ndihmojnë të tjerët "për ta jetuar Jezusin në Eukaristi". “Ndihmojini që edhe ta bëjnë jetën e tyre ofertë për Zotin - shkruan Papa - të bashkuar me jetën e Jezusit në altar, në mënyrë që Ai të njihet, të duhet dhe të shërbehet më mirë”.
Kultivoni ndjenjat e bamirësisë dhe të solidaritetit ndaj të gjithëve
Dëshira e Françeskut për pjesëmarrësit në Kongresin Eukaristik është që takimi t'i ndihmojë të gjithë "të kultivojnë ndjenjat e bamirësisë dhe solidaritetit ndaj të gjithëve, e veçanërisht ndaj atyre që janë në vështirësi, për të cilët rruga e jetës bëhet gjithnjë e më e vështirë". Shumë "njerëzve të çkurajuar, që e shikojnë të ardhmen me skepticizëm dhe pesimizëm, të bindur se nuk ka asgjë që mund t’i bëjë të lum”, shton Papa duke cituar Spes non confundit në Bulën e tij, që shpall Jubileun e 2025, është e nevojshme t'u çosh "shpresën të Zotit”. “Jini dëshmitarë të dhembshurisë së tij dhe të dashurisë së tij të mëshirshme”, përfundon Papa, i cili në fund i lutet Virgjërës për ndërmjetësim, në mënyrë që të gjithë “ta thellojnë ditë për ditë” marrëdhënien e tyre me Krishtin.
