Papa në bisedë me jezuitët e Dilit, përqafimi i një sivëllai 103-vjeçar

R.SH. – Vatikan

Menjëherë pas takimit me ipeshkvijtë dhe klerin në katedralen e Zojës, gjesti i parë i Françeskut sapo hyri sot paradite në sallën e nunciaturës së Dilit, në Timorin Lindor, ku e prisnin 41 jezuitë, ishte përqafimi i Át João Felgueiras, sivëlla 103 vjeçar, një nga tre më të moshuarit në Shoqërinë e Jezusit në mbarë botën.

Dëshmia e Át João

Papa deshi ta përshëndesë publikisht rregulltarin, i cili jeton në Timorin Lindor që nga koha e pushtimit indonezian dhe nuk është larguar kurrë nga vendi e njerëzit e tij, as në çastet më të vështira. Ishte paralajmëruar për këtë prani, ndaj, sapo hyri, shkoi menjëherë tek ai. “E falënderoi dhe e përqafoi. Át João u prek shumë”, deklaroi për mediat e Vatikanit Át Nuno da Silva Gonçalves, drejtor i revistës së jezuitëve “La Civiltà Cattolica”, që e ndjek Papën këto ditë në shtegtimin e tij të 45-të apostolik.

Papa takon Át João Felgueiras, sivëlla 103 vjeçar, një nga tre më të moshuarit në Shoqërinë e Jezusit në mbarë botën

Takimi i dytë me sivëllezërit

Ky i sotmi ishte takimi i dytë i Françeskut me jezuitët, pas bisedës rreth një orëshe të 4 shtatorit në Xhakartë të Indonezisë, me 200 sivëllezër. Një tjetër e pret edhe të enjten, më 12 shtator, në qendrën e ushtrimeve shpirtërore “Shën Françesk Ksaveri” në Singapor. Ndër 41 anëtarët e Shoqërisë së Jezusit, takuar sot, 8 novicë. “Si gjithmonë në këto takime – pohon Át Gonçalves – u krijua një atmosferë familjare”. Jezuitët e pranishëm vinin nga Vietnami, Malajzia dhe Filipinet. Pra, “një grup i larmishëm, i angazhuar në punë të ndryshme, për shembull, me edukimin e të rinjve, ose në një institut formimi për mësuesit. Punë, që ata e konsiderojnë të rëndësishme në të njëjtin nivel me ushtrimet shpirtërore nëpër famulli”. Takimi zgjati rreth 45 minuta, gjatë të cilave Papa shpjegoi si e sheh veprimtarinë e jezuitëve në vende të ndryshme, foli mbi impenjimin kishtar për drejtësinë shoqërore, mbi Doktrinën shoqërore të Kishës e rëndësinë e saj.

Rëndësia e inkulturimit

Në veçanti, Át Nuno vërejti se edhe në raste të tjera në Timorin Lindor, Papa Françesku “duke folur për Ungjillin dhe kulturën, ka nënvizuar vlerën e inkulturimit. Domethënë faktin se Ungjilli duhet inkulturuar dhe kultura duhet ungjillëzuar”. Kjo është një temë e përsëritur në etapën timoreze të udhëtimit, me moton “Que a vossa fé seja a vossa cultura” (Feja juaj qoftë kultura juaj).