Papa në Gemelli, në 12-vjetorin e fillimit të papnisë

R.SH. - Vatikan

Papa Françesku vijon të jetë i shtruar në Poliklinikën Gemelli të Romës, ku ndodhet që nga 14 shkurti. Aty i erdhën edhe urimet për 12-vjetorin e fillimit të papnisë. Kujtojmë se si sot, pikërisht më 19 mars 2013, Ati i Shenjtë filloi zyrtarisht misionin e tij në krye të Kishës Universale, pas zgjedhjes në fronin e Shën Pjetrit, më 13 mars të atij viti.

Magjisteri i Papës Françesku ka vënë në qendër të reflektimit kishtar e shoqëror, në nivel ndërkombëtar, shumë tema të rëndësishme për botën e sotme si: përparësinë e Kishës për të varfrit, pasojat e ndryshimeve të klimës, rëndësinë e shpresës, humnerën ku çojnë logjikat e forcës dhe të mbizotërimit, përdorimin etik të teknologjisë e sidomos, çështjen e paqes me thirrjet e tij të shumta për t’u dhënë fund konflikteve.  

Muajin e fundit i shtruar në spital, Ati i Shenjtë po lufton me sëmundjen, duke u përmirësuar vazhdimisht, siç njofton Salla e Shtypit e Selisë së Shenjtë. Duke i nënshkruar dokumentet prej dhomës në katin e dhjetë, Papa Françesku ka vazhduar t’u japë besimtarëve reflektimin e tij, në tekstet e audiencës së përgjithshme e të Engjëllit të Tënzot, publikuar të mërkurave e të dielave, por ka vazhduar edhe të ngrejë zërin kundër luftërave, duke bërë thirrje për paqen, sidomos në Ukrainë e në Tokën Shenjte.