Askofu Lazarus Msimbe: Ufufuko wa Kristo Yesu Ni Kiini Cha Imani
Na Angela Kibwana, - Morogoro
Ufufuko wa Kristo Yesu kutoka kwa wafu ni kilele cha imani katika Kristo Yesu. Hili ni tukio la kihistoria na lenye ubora wa hali ya juu kabisa, ambalo limeshuhudiwa na wanawake jasiri, Mitume na Wakristo wa Kanisa la Mwanzo. Kristo Mfufuka baada ya mateso, kifo na ufufuko wake alianzisha mahusiano mapya na wanafunzi wake kwa njia ya kugusa na kushiriki chakula. Mwili wa Kristo Mfufuka katika ufufuko amejazwa nguvu ya Roho Mtakatifu; Unashiriki maisha ya uzima wa Kimungu katika hali ya utukufu, kiasi kwamba, Kristo Yesu anakuwa kweli ni mtu wa kimbinguni. Ufufuko wa Kristo Yesu kutoka kwa wafu ni kazi ya Fumbo la Utatu Mtakatifu. Kumbe, ufufuko wa Kristo Yesu ni utimilifu wa Maandiko Matakatifu. Ni chanzo cha maisha na uzima wa milele unaowawezesha waamini kuhesabiwa haki na kufanywa wana wa Mungu. Ufufuko wa Kristo Yesu ni msingi wa ufufuko wa wafu na uzima wa milele ijayo Amina. Rej. KKK 638-655. Tumesikia habari kwamba hakuna Pasaka bila Ijumaa kuu, wala hakuna ushindi pasipo na mateso. Pengine mtu anaweza kujiuliza Pasaka nini. Pasaka ni sherehe ya Kiyahudi iliyowakumbusha jinsi Mungu alivyowakomboa Waisraeli kutoka katika utumwani Misri. Na ufufuko ni hali ya mwili kurudi kuishi baada ya kufa, kwa mfano wa kuamka kutoka usingizini. Ufufuo wa Kristo Yesu ni muhimu kwa sababu kadhaa, Kwanza: unashahudia nguvu kubwa za Mungu Mwenyewe.
Kuamini katika ufufuo ni kuamini katika Mungu Muumbaji na Mkombozi. Kama Mungu yupo, na kama Aliumba ulimwengu na ana uwezo juu yake, ana uwezo wa kufufua wafu, kumbe anastahili imani yetu na ibada. Ni Yule tu pekee aliyeumba maisha anaweza kuyafufua baada ya kufa, ni Yeye anaweza kubadili njia mbaya ambazo ni mauti, na Yeye tu anaweza kuondoa mwiba wa kifo na kwamba ushindi ambao ni kaburi (1 Wakorintho 15:54-55). Katika kumfufua Yesu kutoka kaburini, Mungu anatukumbusha mamlaka yake kamili juu ya hatima ya mwanadamu yaani: maisha na kifo. Pili, ufufuo wa Yesu ni ushahidi wa ufufuo wa binadamu, ambayo ni ni msingi halisi wa imani ya Kikristo. Tofauti na dini nyingine zote, Ukristo peke yake ndio unamiliki mwanzilishi ambaye alipitia mateso, kifo na ambaye anaahidi kwamba wafuasi wake watafanya hivyo. Dini zingine zote zilianzishwa na wanadamu na Manabii ambao mwisho ulikuwa kaburini. Kristo Yesu alitabiri kwamba atarudi kutoka huko siku ya mwisho ili afufue wafu wote na kuwahukumu. “Ndipo watakapomwona Mwana wa Adamu akija katika wingu pamoja na nguvu na utukufu mwingi” (Lk 21:27). “Saa yaja ambayo watu wote waliomo makaburini wataisikia sauti yake.
Katika kusheherekea Pasaka ya Bwana kwa mwaka 2022, Mhasham Askofu Lazarus Vitalis Msimbe, S.D.S., wa Jimbo Katoliki Morogoro katika ujumbe wake wa Pasaka kwa waamini jimboni humo na watu wenye mapenzi mema anasema, “Yesu anafufuka tena na tena kwa kila mmoja wetu na katika miili ya watu. Kristo Yesu anafufuka katika msamaha tunaopokea kutoka kwa Mungu na tunaotoa kwa wengine; na anafufuka katika shughuli zetu na majaribu yetu ya kila siku.” Anasema Ukristo ni dini ya ufufuko. Inaamini kuwa Kristo Mfufuka amebadili mwisho wetu kuwa mwanzo. Alama za maisha mapya zaweza kuonekana katika Dominika ya Pasaka. “Watu huja kushiriki katika Liturujia ya Mwanga wakiwa wamejiandaa kuwasha moto mpya, kuimba nyimbo, kuwasha mishumaa, nguo mpya, mavazi ya kuvutia na ikiwezekana mtoto mchanga kubatizwa, Lakini tusipoteze maana ya alama hizi” anasema Askofu Msimbe. Alama hizi sio tu kielelezo kwamba Yesu Kristo alifufuka kutoka wafu lakini kwamba anafufuka tena. Anafufuka tena kwa kila mmoja wetu na katika miili ya watu, na tena kama kuletwa tena katika maisha ya kweli pamoja na Kristo Yesu (Kol 3:1).
Askofu Msimbe anasema hii inamaanisha kwamba uzi wa fedha wa ufufuo unakimbia kupitia kwa waamini wa wakati wetu, tukiwaweka huru kwa uhusiano mpya na Mungu na kifungo kipya cha upendo pamoja na wengine, kunawawezesha kutambua uwezo wao wa kibinadamu kwa njia mpya na kuwadumisha kupitia mapambano na mapito, dhiki na machungu ya maisha ya mwanadamu hadi washinde. Anasema “tunapata uzoefu wa maisha mapya ya Yesu Mfufuka tunaposamehewa dhambi zetu na Mungu na kupatanishwa naye. “kila amwaminiye Yesu anaondolewa dhambi kwa jina lake” (Mdo 10;43). “Mtakatifu Petro alikuwa na uzoefu kama huo, Alimkana Bwana wake lakini aliposamehewa, furaha ya kusamehewa ilijisogeza moyoni mwake kama vile mtu ajisogezavyo kwenye moto wa makaa ufuoni, alisisitiza mara tatu upendo wake kwa mtu ambaye alimkana mara tatu” anasema. Tunapata uzoefu wa maisha mapya ya Yesu mfufuka wakati sisi wenyewe tunapowasamehe wale ambao wametuudhi na kututenda jeuri. Aidha anasema kuwa “mzigo wa kinyongo ni mzigo mzito. Kama mzigo wa kuni mabegani mwa mbebaji unavyomwelemea, kinyongo chetu kinaweka mipaka ya uhuru wetu wenyewe. “Lakini neema ya ufufuko wa Yesu Kristo inapotuponya kumbukumbu zetu, mzigo wa kutosamehe unaondolewa na tunapata furaha kubwa na uhuru. Kumbukumbu zetu hazitafutwa lakini hazitatusababishia maumivu tena. Badala yake ni kama majeraha kwenye mwili uliofufuka na Yesu ambayo hapo awali yalikuwa dalili za maumivu na ukosefu wa haki lakini sasa yamekuwa ishara ya ushindi.
Tunapata uzoefu wa maisha mapya ya Yesu mfufuka tunapoweza kuvuka kwenye Kalvari zetu za kibinafsi kama vile unyonge kwa sababu tulimwamini Bwana. Hata hivyo Wewe na mimi tunajua unyonge ni nini. Ni kuhisi wenyewe kuzama chini na chini. Walakini, hata ukifika vilindi vya chini kabisa, ikiwa tu utaweka imani yako yote ndani ya Yesu Kristo, utapata amani na utulivu wa ndani. Juu ya uso, tufani kali inaweza bado kuwa inavuma, lakini bado utapata utulivu uliobarikiwa katika mipango ya kina ya nafsi yako, huko ndiko kufufuka kwa Yesu tena. Tunapata uzoefu wa maisha mapya ya Yesu mfufuka kupitia jitihada za kudumu, tunaweza kushinda hata ulemavu wa kudumu wa kimwili na kuishi maisha yetu kwa ukamilifu. Hata katika ulemavu wa aina yoyote usipokata tamaa maisha yanakuwa na maana kinachotakiwa ni kujikaza na kushindana na kila undani wa maisha yako, ukajimimina katika kila siku iliyojaa juhudi na hiyo inakuwa ni sehemu ya ufufuko. Tunapata uzoefu mpya wa maisha mapya ya Yesu mfufuka si tu kama watu binafsi bali pia kama jumuiya. Palipo na kukata tamaa na kuvunjika kwa jumuiya, kuna uwezekano wa ufufuko wa jumuiya. “Vurugu za baadhi ya miji yetu, ukosefu wa usawa wa mali, fursa na matokeo yake ya udhalimu, chuki, ubaguzi dhidi ya matabaka na rangi ni miongoni mwa mifano mingi ya dunia yetu kuvunjika na kuporomoka” anasema Askofu Msimbe.
Ikumbukwe kwamba kumekuwepo na wanaume na wanawake duniani waliopakwa mafuta na Roho Mtakatifu kwa uwezo wa Mwenyezi Mungu kama alivyokuwa kwa Kristo Yesu (Mdo 10:38), ambaye amepigana kwa amani ili kuwakomboa watu waliodhulumiwa katika maisha yao ya jumuiya na kuwaongoza kwenye maisha mapya katika ukweli na haki. Kwa hiyo Yesu anafufuka tena na tena, Hatuna haja ya kungoja hadi tufe ili kushiriki katika uwezo wa ufufuko wa Kristo. Tunaweza kuwa na ufufuo wetu wa kibinafsi na wa kijumuiya hapa duniani na kwa wakati huu wa sasa.
