Papua New Guinea:kati ya waseminari wanaosubiri Papa,kuna ndoto za wakati ujao!

Na Angella Rwezaula – Vatican.

Mungu anataka nini kutoka kwangu? Ni swali kwa kawaida la kila mmoja katika kutafuta maana ya maisha hasa ya wito na hali yoyote ambayo inaweza kujitokeza katika maisha. Kuna furaha na matarajio mengi miongoni mwa wanaseminari vijana wa Papua New Guinea ambapo baada ya siku chache watakutana na Baba Mtakatifu Francisko. Na wakati maandalizi ya mwisho ya mkutano huu yakiendelea, kuna swali ambalo linaendelea kujirudia katika akili zao la: “Je Mungu anataka nini kutoka kwangu?” Katika jumuiya ya seminari kuu inayoitwa “Roho Mtakatifu”, iliyoanzishwa huko Port Moresby mnamo Machi 1963 na miaka michache baadaye ikahamia Bomana (kilomita kumi na mbili kutoka mji mkuu), swali hili pia linakuwa kama dira.

Katika mahojiano na baadhi ya waseminari kwa mujibu wa  Shirika la Habari za Kimisionari Fides, kuna mseminari Mathew Gona, wa Jimbo Kuu la Rabaul, ambaye alisema: “Kuingia katika seminari haikuwa kile nilichokuwa nikifikiria nilipomaliza mzunguko wangu wa masomo. Nilikuwa nalenga kuwa mwalimu au meneja wa biashara. Lakini ulikuwa ni mkutano ambao ulivuruga mipango yote wa “Kukutana na Padre Michael P. Cornelius Gaga ambaye alileta  mabadiliko makubwa maishani mwangu. Nilivutiwa na njia yake ya maisha, utu wake, tabia yake. Mkutano huo ulinifanya nijiulize je 'Mungu anataka nini kutoka kwangu?' Kiukweli, hadi wakati huo nilikuwa nikijiuliza swali lisilo sahihi: 'Ninataka nini?' Mathew alianza kutafakari kwa uzito juu ya njia yake na Fides kwamba: “Nilifanya uchaguzi wa kuingia katika seminari, ambayo ni kinyume kabisa na kile nilichotaka kufanya. Nilizungumza na wazazi wangu ambao waliniunga mkono mara moja na kunitia moyo katika njia hii.”

Hata kwa upande wa mseminari mwingine  Jeffrey Ossom, wa Jimbo la  Madang, kuna kukutana katika  msingi wa chaguo la kuwa padre. Yeye anabainisha: “Nilishiriki katika shughuli za parokia, nilihudhuria vikundi vya vijana. Nilivutiwa na padre wa parokia yangu, ndiye aliyenitia moyo: kuona jinsi anavyoishi wito wake, uwepo wake kati ya watu, unaopatikana kila wakati kutoa msaada na ushauri, maneno ya jamaa zake... Hii ilizaa ndani yangu hamu kuwa siku moja kuhani kama yeye.”Alisisitiza. Kwa njia hiyo kwa kuzungumza na wanaseminari tunatambua kwamba swali hilo, la “Mungu anataka nini kutoka kwangu?, linakuja kama boliti kutoka katika bluu wakati usioweza kufikirika, kwani pia Mseminari mwingine Jacob Tumun, wa Jimbo la Mtakatifu Hagen, alisema:  “Nilikuwa shuleni mwaka wa 2011 nilipoamua kujiunga na 'Klabu ya Ufundi' ya shule yangu. Niliamua kufanya mtihani wa kujiunga na seminari kabla ya kumaliza masomo yangu na siku ya kuhitimu kwangu habari zilifika: mtihani ulipita. Hata hivyo, niliingia katika seminari ndogo mwaka uliofuata: Nilisali kila siku nikimwomba Mungu: 'Unataka nini kutoka kwangu kwa sababu licha ya alama zangu nzuri hakuna mtu angeniajiri. Mwishowe nilielewa kuwa mpango wake ulikuwa tofauti na mnamo 2014 niljiunga katika seminari ndogo huko Kap.”

Historia za Jeffrey, Mathew na Jacob zinafanana katika mambo mengi, licha ya kila mmoja kutoka sehemu tofauti za taifa: ikiwa kila mmoja wao ataulizwa: Ni nani aliyekupa imani?, jibu linalokuja kwa pamoja ni: “Mama na Baba.”  Hii alisema Mathew kuwa  “Maombi ya kwanza ninayokumbuka kujifunza kutoka kwao yalikuwa ishara ya msalaba, Salamu Maria na sala ya kabla ya kulala katika pijini ambayo ni lugha yangu ya asili. Na wakati Jacob alikumbuka kuwa “Mama yangu alinifanya nibatizwe lakini imani yangu ilistawi shukrani kwa babu na bibi na makatekista.” Jukumu la wamisionari lilikuwa muhimu pia katika maisha yao kwani: “Shukrani kwao nimepata njia yangu ya kufikiri, alisisitiza Jeffrey. Kwa upande wa Jacob pia, wamisionari walitimiza fungu muhimu katika elimu yake: “Nilibatizwa na mmoja wao, nilipokea Komunio ya Kwanza kutoka kwa mmisionari Mpolandi. Hata shule niliyosoma iliendeshwa na wamisionari.” “Nilikulia katika parokia inayoendeshwa na wamisionari, paroko wangu alikuwa mmisionari wa Kijerumani.

Nikitazama nyuma - alisema Mathew - ndiye aliyeweka msingi thabiti wa imani yangu na wito wangu. Kama nilivyo hivi leo ni shukrani kwa wamisionari kama Padre Meinard ambao walifanya kazi kubwa sana na isiyochoka katika kujenga imani yangu ya Kikatoliki.” Imani ambayo sasa, pamoja na Ziara ya Kitume, itathibitishwa na Papa: “Kutoka katika mkutano na Papa ninatarajia uthibitisho wa imani lakini pia hamu ya kuunganishwa na Yesu daima ninataka kumfuata katika maisha haya kama kuhani, alibainisha Mathew. Aidha “Itakuwa ni wakati wa neema kwangu ninapozidisha maisha yangu kwa kuendelea kujiuliza ‘Mungu anataka nini kutoka kwangu?.’ Matarajio yale yale pia yamo katika moyo wa Jeffrey: “Itakuwa kama baba anayeweka mkono wake begani mwa mwanawe wakati yuko katika shida kusema: 'Niko hapa, unaweza kufanya hivyo'. Ziara ya Papa baada ya takriban miaka thelathini ni furaha kubwa na baraka kubwa kwetu. Kwa maneno na ishara zake tutapata maisha mapya ya kusonga mbele.”  Kwa upande wa Jacob, hata hivyo, siku mbili za Papa Francisko huko Papua New Guinea zinaweza kuwa mwanzo wa mabadiliko mapya na mengi, ya kiroho na ya kimaadili, nchini humo. Au angalau hilo ndilo ninalotumaini, kama vile ninavyotumaini kwamba Mwenyeheri To Rot anaweza kutangazwa kuwa mtakatifu hivi karibuni ili kuimarisha imani ya watu wetu.”

Baada ya furaha ya mkutano na karamu itakuwa wakati wa kurudi kusoma kwenye madawati: Mathew anavutiwa na liturujia, Jeffry kwa ufafanuzi wa kibiblia, Jacob kwa sakramenti. Changamoto ya kweli itaanza pale watakapowekwa wakfu: “Nataka kujitolea maisha yangu kuwa karibu na maskini, yatima, wajane na wale wanaoishi mbali ili kuwaletea uzuri wa tangazo la Injili”, alisema Mathew. Jeffry pia anataka “kuchafua mikono yake” ili awepo “miongoni mwa watu na kuwa mwenza wao katika safari ya imani, hivyo kumwiga paroko wangu ambaye aliongoza wito wangu huu.” Yakobo, kwa upande mwingine, ndoto za kuwa mponyaji wa roho: "Nataka kuwa, kwa juhudi, muungamishi, kusamehe dhambi na kuwa mkufunzi katika seminari ya Jimbo kuu langu.”