WYD2023 Korea Kusini:vijana kutoka ulimwenguni kote kuelekea Seoul kuwa wamisionari wajasiri!
Na Angella Rwezaula – Vatican.
Kutoka katika nchi ambako imani ilipitishwa bila msaada wa wamisionari, vijana wataitwa kuwa wamisionari hodari ambao wanaweza kushuhudia furaha ya Injili katika kila kona ya sayari hii. Haya ndiyo matumaini ya waandaaji wa Siku ya Vijana Duniani ijayo,(WYD) iliyopangwa kufanyika huko jijini Seoul nchini Korea Kusini, mnamo 2027, ambayo tayari ina nembo na mada yake. "Uwe na ujasiri: nimeushinda ulimwengu!" (Yh 16:33) ni mada iliyochaguliwa na Baba Mtakatifu Francisko, wakati nembo inaonesha msalaba mwekundu na bluu. Rangi hizi zinaashiria ushindi wa ushindi wa Kristo juu ya ulimwengu. Ikihamasishwa na sanaa ya kiutamaduni ya Kikorea, muundo wa jumla unatumia mbinu za kipekee za brashi katika uchoraji wa Kikorea na kujumuisha kwa herufi za Hangul zinazowakilisha tabia za huko Seoul. Zaidi ya hayo, rangi nyekundu ya upande mmoja wa msalaba inafananisha damu ya wafiadini inayopatana na mada ya “ujasiri.” Bluu inawakilisha uchangamfu wa ujana na inaashiria wito wa Mungu pamoja na rangi hizi zinaonesha sababu ya Taegeuk ya bendera ya Korea. Njano inayong'aa nyuma ya msalaba inawakilisha Kristo, ambaye ni "Nuru ya Ulimwengu" na inangaza Kanisa kama jua likichomoza kutoka Mashariki na kuliongoza Kanisa hilo kuelekea umoja.
Yote hayo yalifahamika tarehe 24 Septemba 2024 wakati wa mkutano na waandishi wa habari uliofanyika mjini Vatican, ambao ulihudhuriwa na Kardinali Kevin J. Farrell, Mwenyekiti wa Baraza la Kipapa la Walei, Familia na Maisha, Baraza ambalo liko juu ya Shirika la Maandalizi ya Siku ya Vijana Duniani, Peter Soon-Taick Chung, Askofu Mkuu wa Seoul na Rais wa Kamati ya Maandalizi ya Seoul 2027, Paul Kyung Sang Lee, Askofu Msaidizi wa Seoul na Mratibu Mkuu wa Siku ya Vijana (WYD)huko Seoul 2027
Kujadili changamoto za sasa
"Hija ya WYD huko Seoul 2027 itakuwa zaidi ya mkusanyiko rahisi", alisema Askofu Mkuu wa Seoul, akibainisha kwamba kile kitakachoanza na Jubilei "kitakuwa safari muhimu ambayo vijana, wakiungana na Yesu Kristo, watafakari na kujadili changamoto za kisasa na dhuluma zinazowakabili. Itakuwa sherehe nzuri ambayo itaruhusu kila mtu kupata uzoefu wa kiutamaduni changamfu na cha nguvu iliyoundwa na vijana wa Kikorea. Pia itakuwa fursa ya kujishughulisha ndani na kushiriki utamaduni mahiri na wa shauku ambao Wakorea vijana wamezalisha. Zaidi ya hayo, kupitia sherehe hii, Wakorea vijana watakuwa na fursa muhimu ya kushiriki mahangaiko na mapenzi ya wenzao."
Korea iko katika muktadha wa kipekee
Askofu Paul Kyung Sang Lee kisha alibainisha, kuwa “Korea, iko katika muktadha wa kipekee, tofauti na ule wa matoleo ya awali ya Siku ya Vijana Ulimwenguni, yenye sifa ya kuishi pamoja kwa upatanisho wa tamaduni tofauti za kidini. Katika muktadha huo, Kanisa Katoliki la Korea limejumuisha mara kwa mara fadhila za Kikristo za 'msamaha' na 'kushiriki', kukuza maadili haya katika jamii na kuishi kwa amani na imani nyingine. Katika ukweli unaoendelea wa 'taifa lililogawanyika', katika miongo saba iliyopita Kanisa limefanya kazi kwa bidii kutatua migogoro iliyopo katika mgawanyiko huu, kutafuta amani na umoja kwa watu wa Korea. Kuibuka kwa 'K-Catholic na K-Faith,' miongoni mwa vijana wetu ni ushahidi wa juhudi hizi. Vijana wetu na wamini vijana wanasalia kuwa wazi kwa mazungumzo ya kidini na kutamani kuishi pamoja kwa amani na utulivu."
Ishara za WYD kukabidhiwa 24 Novemba 2024
Safari ya kwenda Seoul, hata hivyo, itapitia Roma kwanza. Kama ilivyo desturi baada ya kila Siku ya Vijana Kimataifa (WYD) kiukweli, vijana wa Lisbon watawakabidhi vijana Wakorea alama za WYD, yaani Msalaba wa Vijana na Picha ya Salus populi romani ,mnamo tarehe 24 Novemba 2024 wakati wa Maadhimisho ya Siku Kuu ya Kristo Mfalme wa Ulimwengu, kwenye Misa Takatifu itakayoongozwa na Baba Mtakatifu katika Kanisa Kuu la Mtakatifu Petro. "Matumaini yetu ni kwamba vijana wengi, hata wale ambao hawajawahi kushiriki katika WYD, watafuata njia hasa ya ndani katika miaka mitatu ijayo kukutana Asia pamoja na Mrithi wa Petro na kutoa pamoja kwa ujasiri ushuhuda wa Kristo ”, alihitimisha Kadinali Farrel.
