Papa amewaombea waathirika wa kigaidi huko Moscow
Na Angella Rwezaula – Vatican.
Baba Mtakatifu amewaombea waathrika wa "shambulio la kigaidi huko Moscow nchini Urusi, mara baada ya hitimisho la Ibada ya Misa Takatifu ya Dominika ya Matawi tarehe 24 Machi 2024 iliyofanyika katika Uwanja wa Mtakatifu Petro mjini Vatican. Katika maelezo yake alionyesha huzuni yake kwa kile kilichotokea nchini Urusi siku mbili zilizopita, na alimwomba Mungu kuwakaribisha waathirika, kuwafariji familia zao na kugeuza mioyo ya wale wanaopanga, kupanga na kutekeleza haya, vitendo visivyo vya kibinadamu vinavyomchukiza Mungu, ambaye aliamuru: Usiue'.
Baba Mtakatifu alianza kusema “Wapendwa kaka na dada, Yesu aliingia Yerusalemu kama Mfalme mnyenyekevu na mwenye amani: tufungue mioyo yetu kwake! Ni Yeye pekee anayeweza kutukomboa kutoka kwa uadui, chuki, vurugu, kwa sababu Yeye ni huruma na msamaha wa dhambi. Tusali kwa ajili ya kaka na dada wote wanaoteseka kwa sababu ya vita;” Baba Mtakatifu akiendelea alisema “Ninaelezea ukaribu wangu kwa Jumuiya ya Mtakatifu Josè wa Apartado, nchini Colombia, ambapo msichana na mvulana waliuawa siku chache zilizopita. Jumuiya hii ilitunukiwa mwaka wa 2018 kama mfano wa kujitolea kwa uchumi wa mshikamano, amani na haki za binadamu.”
Papa Francisko akiendelea alisema: “Na ninawahakikishia maombi yangu kwa wathiriwa wa shambulio la kigaidi la woga lililotekelezwa jioni nyingine huko Moscow. Mungu awakaribishe katika amani yake na awafariji familia zao. Na aongoze mioyo ya wale wanaopanga, kupanga na kutekeleza vitendo hivi visivyo vya kibinadamu, vinavyomchukiza Mungu, ambaye aliamuru: "Usiue" (Kut 20:13).”
Papa Francisko aidha alisema: "Ninwasalimia ninyi nyote, waamini wa Roma na mahujaji kutoka nchi mbalimbali. Hasa ninawasalimu wajumbe kutoka mji wa Sanremo, ambao mwaka huu pia, waaminifu kwa mila ya karne nne, walitoa matawi ya mitende yaliyofumwa kwa sherehe hii. Asante, Sanremo! Bwana awabariki.
Baba Mtakatifu Francisko hakuishia hapo hasa akifikiria sehemu zenye vita kwamba: “Ninawaza kwa namna ya pekee Ukraine inayoteswa, ambako watu wengi wanajikuta hawana umeme kutokana na mashambulizi makali ya miundombinu ambayo, pamoja na kusababisha vifo na mateso, yanahusisha hatari ya janga kubwa zaidi la kibinadamu.
Tafadhali, tusisahau Ukraine inayoteswa na kufikiria Gaza ambayo inateseka sana, na maeneo mengine mengi ya vita. Na sasa tunageuka katika sala kwa Bikira Maria: tujifunze kutoka kwake kukaa karibu na Yesu katika siku za Juma Takatifu, kufikia furaha ya Ufufuko.” Amehitimisha.
