Papa na wasiwasi wa mizozo mipya katika Ulimwengu
Na Angella Rwezaula – Vatican.
Baba takatifu Franciskko, tarehe 5 Juni 2024 ametuma barua kwa Askofu Jacques Habert, Askofu wa Bayeux na Lisieux, nchini Ufaransa kwamba anayo furaha kujumuika, katika mawazo na sala, na watu wote waliokusanyika katika Kanisa kuu hili la Bayeux kuadhimisha kumbu kumbu ya mwaka wa 80 tangu kutua kwa majeshi ya Muungano huko Normandy. Papa amewasalimu viongozi wote wa kiraia, kidini na kijeshi waliopo. “Tunathamini katika kumbukumbu zetu kumbukumbu ya juhudi hizo kubwa na za kuvutia za pamoja na za kijeshi zilizofanywa kufikia kurejea kwa uhuru. Na tufikirie pia juu ya gharama iliyolipwa kwa juhudi hiyo: yale makaburi makubwa ambapo maelfu ya makaburi ya askari yalipangwa - wengi wao wakiwa vijana sana na wengi waliotoka mbali - ambao walitoa maisha yao kishujaa, na hivyo kuruhusu mwisho wa vita vya II vya Ulimwengu. Vita na urejesho wa amani, amani ambayo - angalau kwa Ulaya imedumu kwa karibu miaka 80.”
Wahanga wengi wasi na hatia
Baba Mtakatifu aidha amebainisha: “Kutua pia kunaleta akilini na kusababisha mfadhaiko, taswira ya miji hiyo katika Normandy iliyoharibiwa kabisa: Caen, Le Havre, Saint-Lô, Cherbourg, Flers, Rouen, Lisieux, Falaise, Argentan... na wengine wengi; na pia tunataka kuwakumbuka wahanga wa raia wasio na hatia wasiohesabika na wale wote waliopatwa na milipuko hiyo mbaya ya mabomu. Lakini kutua kunaibua, kwa ujumla zaidi, maafa yanayowakilishwa na mzozo huo mbaya wa ulimwengu ambao wanaume, wanawake na watoto wengi waliteseka, familia nyingi zilisambaratika, uharibifu mwingi ulisababishwa.” Papa Francisko anakazia kusema kuwa itakuwa kazi bure na unafiki kuikumbuka bila ya kushutumu na kukataa kwa hakika; bila kurudia kilio cha Mtakatifu Paulo VI kwenye jukwaa la Umoja wa Mataifa tarehe 4 Oktoba 1965: Vita visiwepo tena! Ikiwa, kwa miongo kadhaa, kumbukumbu ya makosa ya zamani iliunga mkono nia thabiti ya kufanya kila linalowezekana kuzuia kuzuka kwa mzozo mpya wa ulimwengu wazi, ninaona kwa huzuni kwamba leo hii sio kesi tena na kwamba watu wana kumbukumbu ya muda mfupi tu. Maadhimisho haya yatusaidie kujipata tena!
Wasiwasi wa dhana ya mzozo kutotiliwa uzito tena
Kiukweli, inatia wasiwasi kwamba dhana ya mzozo wa jumla wakati mwingine haichukuliwi kwa uzito tena, kwamba watu wanazoea polepole tukio hili lisilokubalika. Wananchi wanataka amani! Wanataka hali ya utulivu, usalama na ustawi, ambayo kila mtu anaweza kutimiza wajibu wake na hatima yao kwa amani. Kuharibu utaratibu huu adhimu wa mambo kwa matamanio ya kiitikadi, utaifa na kiuchumi ni kosa kubwa mbele ya wanadamu na mbele ya historia, ni dhambi mbele za Mungu. Kwa hiyo Baba Mtakatifu amependa kuungana na maombi yake Askofu Mkuu na ya wale wote waliokusanyika katika Kanisa lake Kuu: “Tuwaombee watu wanaotaka vita, kwa ajili ya wale wanaowaachilia, kuwachochea bila maana, kuwadumisha na kurefusha bila sababu, au kufaidika nao kwa kejeli. Mungu awatie nuru mioyoni mwao, awaweke mbele ya macho yao maandamano ya misiba wanayosababisha! Tuwaombee wapenda amani. Kutaka amani sio woga, badala yake kunahitaji ujasiri mkubwa, ujasiri wa kuweza kuacha kitu. Hata kama hukumu ya wanadamu wakati fulani ni kali na isiyo ya haki kwao, “wapatanishi… wataitwa wana wa Mungu”(Mt 5:9). Aidha wale ambao kwa kupinga mantiki isiyoweza kubadilika na ya ukaidi ya migogoro, wanajua jinsi ya kufungua njia za amani za kukutana na mazungumzo. Wadumu bila kuchoka katika nia zao na juhudi zao ziwe taji la mafanikio.”
Maombi kwa wahanga wa zamani wa vita na sasa
Hatimaye, Baba Mtakatifu amesema: “tuwaombee wahanga wa vita; vita vya zamani na vya sasa. Mungu awakaribishe ndani yake wale wote waliokufa katika migogoro hiyo ya kutisha, awasaidie wale wote wanaoteseka leo; maskini na wanyonge, wazee, wanawake na watoto daima ni wahanga wa kwanza wa majanga haya. Mungu atuhurumie! Kwa kuomba ulinzi wa Mtakatifu Mikaeli, Mlinzi Mtakatifu wa Normandy, na maombezi ya Bikira Mtakatifu Maria, Malkia wa Amani, kwa moyo wote, Papa ametoa Baraka zake kwa kila mmoja.
