Papa Francisko:Bwana pekee anaokoa ubinadamu wetu dhaifu na katikati ya dhiki

Na Angella Rwezaula – Vatican.

Jumatatu tarehe 19 Agosti 2024, Baba Mtakatifu Francisko ametuma ujumbe kwa Askofu Nicolò Anselmi wa Jimbo Katoliki la Rimini nchini Italia, katika fursa ya Mkutano wa Urafiki wa Watu, uliyoandikwa na Kardinali Pietro Parolin, Katibu wa Vatican, Jumatatu tarehe 19 Agosti 2024. Katika ujumbe huo Kardinali Parolin anaandika kuwa  “wakati wa Mkutano wa 45 wa Urafiki kati ya Watu, Baba Mtakatifu anawataka washiriki kuwaptia  ujumbe wa matashi mema, akitoa salamu kwa waandaaji, watu wa kujitolea na wale wote watakaoshiriki katika hafla hiyo, ambao unaongozwa na kauli mbiu  ikiwakilisha wito wa dhati wa  kuwajibika kwamba: “Ikiwa hatutafuti umuhimu, basi tunatafuta nini?” Hata tunapopitia nyakati ngumu, utafutaji wa kile kinachojumuisha kitovu cha fumbo la maisha na ukweli ni wa umuhimu mkubwa. Enzi yetu, kiukweli, inaoneshwa na shida mbali mbali na changamoto mashuhuri, ambayo wakati mwingine tunapata hali ya kutokuwa na uwezo, tabia ya kushindwa na ya kupita kiasi ambayo inaweza kusababisha kuvuta maisha na kujiruhusu kuzidiwa na usingizi, hadi kupoteza maana ya kuwepo. Katika hali hii, kwa hivyo, chaguo la kufuatilia kile ambacho ni muhimu ni muhimu zaidi kuliko hapo awali.

Jaribio la kutafuta kwa shauku na ari kinacholeta uzuri wa maisha

Kwa hiyo Papa Francisko anahimiza jaribio la kutafuta, kwa shauku na ari kile kinacholeta uzuri wa maisha, akijibu swali lililoulizwa na Padre Luigi Giussani aliposema kwa ujasiri: “Moyo unaliwa na ugonjwa wa kupooza, kupoteza hamu na ladha ya maisha. […] Uzee wa miaka ishirini na hata mapema zaidi, uzee wa miaka kumi na tano, hii ndiyo tabia ya ulimwengu wa sasa” (Maana ya  kidini, Milano 2013, 116˗117). Huku upepo baridi wa vita unavyovuma, ukiongeza matukio ya mara kwa mara ya ukosefu wa haki, vurugu na ukosefu wa usawa, pamoja na dharura mbaya ya hali ya hewa na mabadiliko ya kianthropolojia ambayo hayajawahi kushuhudiwa, ni muhimu kuacha na kujiuliza: je, kuna kitu chenye thamani ya kuishi na kutumainia? Tangu mwanzo wa Upapa wake, Baba Mtakatifu Francisko anatuhimiza pia kusoma upinzani, mapambano na anguko la wanaume na wanawake wa siku hizi kama wito wa kutafakari, ili moyo ufunguke kwa kukutana na Mungu na kila mtu ajitambue mwenyewe na wengine na ukweli. Mwaliko wake wa mara kwa mara ni kuwa ombaomba wa kile ambacho ni muhimu, cha kile kinachofanya maisha yetu kuwa na maana, kwanza kabisa kwa kujiondoa sisi wenyewe yale yanayolemea maisha ya kila siku, kwa kufuata mfano wa mpandaji ambaye, baada ya kufikia mwanzo wa uso wa mwamba, lazima kuondokana na ujuu juu, wa kuwa na uwezo wa kupanda kwa haraka zaidi.

Ni urafiki pamoja na Mungu kwa kuonesha uhusiano na wengine

Kwa kufanya hivyo, tunagundua kwamba thamani ya kuwepo kwa binadamu haijumuishi mambo, katika mafanikio yaliyopatikana, katika mbio za ushindani, lakini juu ya yote katika uhusiano huo wa upendo unaotuunga mkono, unaoweka njia yetu katika uaminifu na matumaini: ni urafiki pamoja na Mungu, ambao wakati huo unaoneshwa katika mahusiano mengine yote ya kibinadamu, ili kupata furaha ambayo haitashindwa kamwe. Tunapendwa, huu ndio ukweli muhimu ambao Padre Giussani mwenyewe alitangaza kwa wanafunzi vijana wa chuo kikuu: “Unapendwa. Huu ndio ujumbe unaokuja katika maisha yako […]. Huyu ndiye Yesu Kristo katika historia ya mwanadamu, mwanzo endelevu wa ujumbe huu: “Unapendwa!”. Maisha ni nini? Kupendwa. Na kiumbe tulicho nacho juu yetu? Kupendwa. Na hatima? Kupendwa” (rej. Litterae Communionis Tracce, 1996, n. 1). Katika ulinganifu huo huo, Papa Francisko anakumbuka kwamba “kile ambacho kwetu sisi ni muhimu, kizuri zaidi, cha kuvutia zaidi na wakati huo huo muhimu zaidi ni imani katika Kristo Yesu” ( Hotuba ya Mkutano Mkuu wa  Baraza la Kipapa la Mafundisho Tanzu ya Kanisa, 26 Januari 2024).

Ni Bwana peke yake anaokoa udhaifu wetu katikati ya dhiki

Ni Bwana pekee, kiukweli, anaokoa ubinadamu wetu dhaifu na, katikati ya dhiki, hutufanya tupate furaha ambayo isingewezekana. Bila sehemu hii ya nanga, mashua ya maisha yetu ingekuwa chini ya rehema ya mawimbi na ingehatarisha kuzama. Kurudi katika umuhimu ambao ni Yesu, haimaanishi kutoroka kutoka katika ukweli, lakini, kinyume chake, ni hali ya kuzama kweli katika historia, kwa kukabiliana nayo bila kukwepa changamoto zake, kupata ujasiri wa kuhatarisha na kupenda hata inapoonekana si thamani yake, kuishi katika dunia bila hofu yoyote. Kama vile Askofu Mkuu Montini alivyoandika: “Wewe ni muhimu, Ee Kristo, Ee Bwana, Ee Mungu-pamoja nasi, kujifunza upendo wa kweli na kutembea katika furaha na nguvu ya upendo wako, kwenye njia ya maisha yetu ya kuchosha” (Omnia nobis est Christus barua ya kichungaji kwa Jimbo kuu la Milano ya Kwaresima 1955). Kwa hiyo, katika roho hii, Baba Mtakatifu anathamini na kushiriki madhumuni ya Mkutano ujao, kwa sababu kulenga mambo muhimu kunatusaidia kutawala maisha yetu na kuyafanya kuwa chombo cha upendo, huruma na upole, na kuwa ishara ya baraka kwa inayofuata.       

Katikati ya kishawishi cha kukata tamaa tuwe wahusika wakuu

Kutokana na kukabiliwa na kishawishi cha kukatishwa tamaa, utata wa mgogoro uliopo na hasa changamoto ya amani inayoonekana kutowezekana, Baba Mtakatifu anahimiza kila mmoja kuwa mhusika mkuu wa mabadiliko kwa kuwajibika, kwa kushirikiana kikamilifu katika utume wa Kanisa, ili kutoa maisha pamoja, hadi mahali ambapo uwepo wa Kristo unaweza kuonekana na kuguswa. Dhamira hii ya pamoja inaweza kuzalisha ulimwengu mpya, ambapo Upendo ambao umejidhihirisha kwetu katika Kristo hatimaye unashinda, na sayari nzima inakuwa hekalu la udugu. Baba Mtakatifu Francisko anatumaini kwamba, mpango tajiri wa Mkutano huo, kwa wingi wa mapendekezo na lugha, unaweza kuamsha shauku kwa wengi ya kuwa watafutaji wa mambo muhimu na kufanya shauku ya kutangaza Injili, chemchemi ya ukombozi kutoka kwa utumwa wote,  kustawi mioyoni mwao na nguvu zinazoponya na kubadilisha ubinadamu. Kwa kila mtu, waandaaji, wanaojitolea na washiriki, Yeye anatuma baraka zake kwa moyo wote,huku akiomba tafadhali kumwombea. Kwa kuongeza pia Kardinali Parolin alitoa matashi mema yake kibinafsi, kwa kutumia fursa hiyo ya kujithibitisha kwa hisia za heshima tofauti.