Papa:Mwaliko wa Yesu ni kuinua vichwa juu na msiache mioyo yenu iwe mizito!

Na Angella Rwezaula – Vatican.

Katika Dominika tarehe Mosi Desemba 2024, Baba Mtakatifu Francisko ametoa tafakari yake akiwa katika dirisha la Jumba la Kitume kwa waamini na mahujaji waliofika katika Uwanja wa Mtakatifu Petro, mjini Vatican. Papa akianza tafakari hiyo alisema: “Injili ya Liturujia ya leo (Lk 21,25-28:34-36), ya Dominika ya kwanza ya Majilio, inazungumza nasi juu ya machafuko ya ulimwengu na wasiwasi na hofu katika wanadamu. Katika muktadha huo, Yesu anaelekeza neno la tumaini kwa wanafunzi wake kwamba: “Simameni, mkaviinue vichwa vyenu, kwa maana ukombozi wenu umekaribia” (Lk 21,28). Wasiwasi wa Bwana ni kwamba mioyo yao isiwe mizito (Lk 21, 34) na kwamba wangojee kwa uangalifu kuja kwa Mwana wa Adamu.” Papa Francisko ameongeza kusema: “Mwaliko wa Yesu ni huu: kuviinua vichwa kuelekea juu na kubaki na  moyo mwepesi na kukesha.” Kiukweli, watu wengi wa siku za Yesu, walikabili matukio yenye mikasa ambayo waliona yakitukia karibu nao kama vile mateso, migogoro, majanga ya asili  na walishikwa na uchungu na kufikiri kwamba, mwisho wa ulimwengu unakaribia."

Waamini na mahujaji waliokusanyika katika Uwanja wa Mt. Petro

Kwa hiyo "Nyoyo zao zilijaa hofu.” Yesu, hata hivyo, anataka kuwaweka huru kutokana na mahangaiko ya sasa na imani potofu, akionesha jinsi ya kukesha moyoni, jinsi ya kusoma matukio kuanzia na mpango wa Mungu, ambao huleta wokovu hata katika matukio makubwa zaidi ya kihistoria.” Kwa sababu hiyo Papa alisisitiza “anawashauri waelekeze macho yao kuelekea Mbinguni ili kuelewa mambo ya dunia kwamba: “Simameni, mkaviinue vichwa vyenu”(Lk 21,28).” Papa amekazia kusema kuwa hiyo ni nzuri  ya kusema kwamba: "Inukeni na inueni vichwa vyenu." Kwa njia hiyo pendekezo la Yesu ni muhimu na kwetu pia lile la: “Msiache mioyo yenu iwe mizito” (Lk 21, 34). Sisi sote, katika nyakati nyingi za maisha, tunajiuliza: tunawezaje kuwa na moyo "mwepesi", moyo ulio macho, moyo huru? Moyo ambao haujiruhusu kupondwa na huzuni? Na huzuni ni mbaya na  ni mbaya sana Papa amekazia kusema.

Mahujaji na waamini kutoka sehemu mbali mbali katika Uwanja wa mt. Petro

Papa Francisko amebainishha kwamba “Kiukweli, inaweza kutokea kwamba mahangaiko, woga na wasiwasi kuhusu maisha yetu ya kibinafsi au kuhusu kile kinachotokea ulimwenguni leo hii, kulemea kama mawe na kutuvunja moyo. Ikiwa wasiwasi huulemea moyo na kutufanya tujifungie wenyewe, basi Yesu, kinyume chake, anatualika tuinue vichwa vyetu, tutegemee upendo wake unaotaka kutuokoa na unaotukaribia katika kila hali ya maisha yetu, anatuomba tumpe nafasi ili apate tena kuweka  tumaini.” Kwa hiyo Papa Francisko amesema “hebu tujiulize: je, moyo wangu unaelemewa na woga, wasiwasi, na mahangaiko ya wakati ujao? Je! ninajua jinsi ya kutazama matukio ya kila siku na matukio ya historia kwa mtazamo wa  Mungu, katika maombi, kwa upeo mpana zaidi? Au ninajiachia nivunjike moyo?  Papa amehitimisha kwa kusema “Ninaomba wakati huu wa Majilio ili  uwe fursa adhimu ya kuinua macho yetu kumwelekea yeye, ambaye anaifanya nuru mioyo yetu na kututegemeza katika safari. Na sasa  tumwite Bikira Maria, ambaye hata katika nyakati za majaribu alikuwa tayari kukaribisha mpango wa Mungu.”