Papa amewateua Maaskofu wawili wasaidizi wa Jimbo Kuu katoliki la Nairobi Kenya

Na Angella Rwezaula – Vatican.

Baba Mtakatifu Jumanne tarehe 13 Februari 2024 amewateua Maaskofu Wasaidizi wawili (2) wa  Jimbo kuu Katoliki la Nairobi nchini  (Kenya): Mheshimiwa sana Padre  Simon Peter Kamomoe, wa Jimbo kuu hilo hilo, ambaye hadi uteuzi huo  alikuwa ni Msimamizi wa Kanisa Kuu la Familia Takatifu, Nairobi, huku akimkabidhi kiti cha uwakilishi wa Tubune wa Numidia; Na Padre  Wallace Ng'ang'a Gachihi, Jimbo hilo hilo ambaye  hadi uteuzi huo alikuwa  Paroko na Mratibu wa Huduma ya Kichungaji ya Jimbo kuu kwa kumpatia makao ya Tucca wa Mauritania.

Wasifu wa Padre Simon Peter Kamomoe

Askofu Mteule, Padre  Simon Peter Kamomoe alizaliwa tarehe 26 Novemba 1962 huko Gatundu (wilaya ya Kiambu), katika Jimbo Kuu la Nairobi. Baada ya kuhudhuria Seminari Kuu ya Molo, alisoma Falasama katika Seminari Kuu ya Mtakatifu Augustine ya Mabanga na Taalimungu katika Seminari Kuu ya Mtakatifu Matthias Mulumba huko  Tindinyo.

Alipewa daraja la upadre mnamo tarehe 18 Juni 1994 kwa ajili ya Jimbo Kuu la Nairobi.

Nyadhifa nyingine

Alishikilia nyadhifa na kuendelea na masomo zaidi: Msaidizi katika Seminari ya Malkia wa Mitume jijini Nairobi(1994-1995); Msaidizi katika parokia za Thigio (1995), Mang'u (1995-1996), Ndundu (1996-1997), Mtakatifu Matthias Mulumba huko Thika (1997-1998); paroko wa Mama Yetu wa Fatima huko Kiriko (1998-1999); Paroko wa Mtakatifu Petro  na Paulo huko Kiambu na wakati huo huo, Makamu wa  Forane na Mjumbe wa Baraza la Washauri (1999-2008). Tangu 2008 amekuwa Msimamizi wa Kanisa Kuu la Familia Takatifu  Nairobi na Msimamizi wa  huduma ya kichungaji ya familia.

Wasifu wa  Askofu Mteule, Padre  Wallace Ng'ang'a Gachihi

Askofu Mteule Wallace Ng'ang'a Gachihi alizaliwa tarehe 26 Machi 1973 huko Gatundu (wilaya ya Kiambu), katika Jimbo Kuu la Nairobi. Baada ya Majiundo katika Seminari Kuu ya Mtakatifu Maria huko Molo, aliendelea na Falsafa katika Seminiari Kuu ya  Mabanga na Taalimungu katika Seminari Kuu ya Mtakatifu Matthias Mulumba huko  Tindinyo.

Alipewa darala la Upadre mnamo tarehe 21 Mei 2005 kwa ajili ya Jimbo Kuu la Nairobi Kenya.

Nyadhifa nyingine

Alishikilia nyadhifa kadhaa na masomo zaidi: Kuwa Paroko msaidizi katika  Parokia ya Watakatifu Petro na Paulo huko Kiambu (2005-2006); Paroko wa Parokia ya Mtakatifu Petro na Paulo huko Kiambu (2006-2009); Mwanafunzi wa Shahada ya Uzamili katika Taalimungu  ya Kichungaji katika Chuo Kikuu Katoliki cha Afrika Mashariki-CUEA (2009-2011) na, wakati huo huo, kuwa Msaidizi wa Parokia ya  Malkia wa Mbingu ya  Karen (2009-2015); mnamo 2015 amekuwa Paroko wa Parokia ya Kristo Mfalme huko Embakasi na, tangu 2011, Mratibu wa Huduma ya Kichungaji Jimbo kuu. Yeye ni mwanachama wa Baraza la Washauri.