Vatican,Mons.Gyhra:Kuna hitaji la kuunga mkono waathirika wa biashara haramu ya binadamu
Na Angella Rwezaula – Vatican.
Katika hotuba ya Askofu Mkuu Richard Gyhra Mwakilishi wa Kudumu wa Vatican, katika Shirikisho la Ushirikiano wa Kimataifa, Usalama na Maendeleo Barani Ulaya(OSCE),katika kikao cha 12 cha Mkutano wa Nchi Wanachama wa Mkataba wa Umoja wa Mataifa wa Kupambana na Uhalifu wa Kimataifa, tarehe 14 Oktoba 2024 huko Geneva, Uswiss, alianza kwa kumpongeza Mwenyekiti na maafisa wengine kwa kuchaguliwa kuwa mwenyekiti wa kikao hicho. Askofu Mkuu alisema: “Ingawa vitendo vyote vya uhalifu vinapinga utaratibu wa umma, uhalifu uliopangwa wa kimataifa ni mbaya sana kwani unadhoofisha manufaa ya wote duniani kote." Shughuli za uhalifu duniani ni kichocheo cha kukosekana kwa utulivu wa kisiasa na kijamii, hasa katika mizozo, ukosefu wa usalama, mazingira magumu au ukosefu wa utawala wa sheria.” Kwa kuongeza alimnukuu Baba Mtakatifu Francisko kwamba: “Uhalifu uliopangwa, ambao unajidhihirisha kama kundi lililoundwa ambalo hutulia kwa wakati na kutenda kwa pamoja kufanya uhalifu kwa madhumuni ya kupata faida ya nyenzo au kiuchumi, ni wa kimataifa katika tabia na kukumbatia aina zote kuu za biashara haramu ya binadamu.
Mapambano dhidi ya uhalifu
Mapambano dhidi ya haya alisisitiza kuwa "ni moja ya changamoto muhimu kwa jumuiya ya kimataifa, kwani inawakilisha, pamoja na ugaidi, tishio muhimu zaidi lisilo la kijeshi kwa usalama wa kila taifa na kwa utulivu wa kiuchumi wa kimataifa.” Mwakilishi wa Kudumu wa Vatican aidha alisema kuwa: “Tangu kuanza kutumika kwa Mkataba huu, vitendo vya uhalifu wa kimataifa kwa huzuni vimeendelea kukua mara kwa mara, uzito na athari zake mbaya. Faida yake haramu kwa ujumla inaendelea kuongezeka, huku aina mpya na za zamani za uhalifu zikitekelezwa, ikijumuisha kupitia tasnia tata na haribifu ya usafirishaji haramu wa watu, viungo, dawa za kulevya na silaha: “Uhalifu uliopangwa, katika ukatili wake, hufanya kazi kinyume na manufaa ya wote; inashambulia mamilioni ya wanaume na wanawake ambao wana haki ya kuishi maisha yao wenyewe na kulea watoto wao kwa heshima na bila njaa na woga wa jeuri, uonevu au ukosefu wa haki.”
Uhalifu wa kupangwa kimataifa lazima ulaaniwe
Uhalifu uliopangwa wa kimataifa lazima ulaaniwe, uzuiwe na upigwe vita katika ngazi zote, hasa kupitia ushirikiano wa kimataifa. Vatican inakaribisha ukweli kwamba taratibu za ushirikiano wa mahakama na polisi zilizoainishwa katika Mkataba huo zimeonekana kuwa za thamani sana katika kutenganisha mitandao ya wahalifu, kuwashtaki na kuwarejesha wahalifu wahalifu na kurudisha faida ya uhalifu kwa nchi zao za asili. Mafanikio ya Mkataba huu yanatokana na ukweli kwamba vikosi vya polisi, waendesha mashtaka na majaji wanategemea mapambano yao ya kila siku dhidi ya uhalifu. Kwa upande mwingine, haitoshi kuwashtaki wahusika tu; lazima pia kukuza ustawi na unafuu wa waathirika wake. Kama Papa Francisko alisisitiza: "Kuna hitaji muhimu la kuunga mkono, kusindikiza na kuwaunganisha tena waathiriwa wa biashara haramu ya binadamu katika jumuiya zetu na kuwasaidia katika mchakato wa uponyaji na kurejesha heshima yao."
Aina 4 za utunzaji:kukaribisha,kulinda,kuhamasisha na kuunganisha
Katika suala hili, ni jambo lisilokubalika kabisa kwamba waathiriwa wa usafirishaji haramu wa binadamu wakati mwingine wanatengwa au kuadhibiwa zaidi kwa sababu tu walidhulumiwa hapo awali. Badala yake, Mataifa na jumuiya zinapaswa kufanya kila jitihada kukaribisha, kulinda, kuhamasisha na kuunganisha watu hawa kwa manufaa yao na ya jamii. Kwa upande wake, Kanisa Katoliki kupitia taasisi zake nyingi za matunzo kote duniani, limejitolea kusaidia katika ukarabati wa wahanga, huku likishirikiana na mamlaka nyingine za kusimamia sheria na asasi za kiraia ili kukomesha janga la biashara haramu ya binadamu.
