Congo,DR,watoto 400elfu hawana matibabu na elimu

Na Angella Rwezaula – Vatican.

Takriban watu milioni moja wamelazimika kuyahama makazi yao kutokana na mzozo unaoikumba Jamhuri ya Kidemokrasia ya Congo kutoka kaskazini hadi kusini. “Hadi sasa tulikuwa tumezoea kuzungumzia Jamhuri ya Kidemokrasia ya Congo ikimaanisha Kivu Kaskazini na mara nyingi tumeshuhudia simulizi ya mapigano kati ya wanajeshi wanaounga mkono Rwanda na Congo. Kiukweli, kuibuka tena kwa mzozo huu kumeenea hadi Kivu Kusini, katika sehemu ya mashariki." Alizungumza hayo Andrea Iacomini, msemaji wa Unicef ​​​​Italia, shirika ambalo limekuwa likijihusisha na shughuli za usaidizi wa kibinadamu katika nchi hiyo ya Kiafrika kwa miaka.  Akiendelea alieleza Iacomini kuwa “Kinachoshangaza ni idadi kubwa ya watu wanaolazimika kuacha nyumba zao. Takriban 400,000 kati yao ni watoto tu, lakini kinachoshangaza zaidi ni hali wanazojikuta nazo: wengi wao ni wakimbizi shuleni, wengine makanisani au hata nje. Hawana maji safi, usafi wa mazingira, matibabu na elimu.”

ongezeko la ukatili dhidi ya watoto

Mgogoro unaoendelea umesababisha ongezeko la ukatili dhidi ya watoto: tangu Januari kumekuwa na ongezeko la 150% ikilinganishwa na Desemba "Tunazungumzia unyanyasaji wa kijinsia, mauaji, ukeketaji, hadi matumizi ya watoto na makundi yenye silaha na kuajiri." Katika muktadha huo, Iacomini alisisitiza hali ya kusikitisha kuhusu sekta ya afya: "Hospitali zimejaa, kuna uhaba wa dawa, vituo vya afya 15 vimeharibiwa." Na kuenea kwa magonjwa kama vile kipindupindu na surua pia kunatia wasiwasi: "Kumekuwa na visa 370 vya kipindupindu tangu Januari, 150 mnamo Februari pekee, na kuna hatari ya kuenea zaidi kati ya waliohamishwa." Halafu kuna suala la elimu: “Tunafanya kazi ya kuwarudisha watoto shuleni, lakini katika jimbo hili shule elfu moja zimefungwa, na kukatishwa kwa elimu kwa wanafunzi 300,000.  

Shule na makanisa yamekuwa makazi ya familia nyingi zilizohamishwa

Huko Bukavu, shule zimebadilishwa kuwa makazi ya familia zilizohamishwa, hivyo basi hakuna suluhisho mbadala ama kutoka katika mtazamo wa kibinadamu au wa kielimu. Aidha, wapo watoto wengi wasio na wazazi ambao wamefiwa na mama au baba au wote wawili, tumeweza kusaidia takribani asilimia 40 ya wale tunaowakuta na vituo vya kusikiliza vya uendeshaji ambapo tunatoa huduma za usaidizi. Lakini bado kuna mengi ya kufanya." Upatikanaji wa maji ya kunywa pia unastahili kuzingatiwa, kwani unachangia kuzaliwa kwa magonjwa ya milipuko na maendeleo yao:  "Pamoja na vituo vipya vya utakaso tumeleta takriban lita elfu 180 za maji safi kwa siku, lakini ni muhimu kwamba pande zinazozozana zisitishe uhasama mara moja.

Kulinda watoto kwa kufuata sheria za kimataifa za binadamu

Kuwalinda watoto, kwa kufuata sheria za kimataifa za binadamu, ni jambo la msingi.” Maamuzi ya hivi karibuni ya serikali ya Marekani ya kufungia fedha za USAids zilizotengwa kwa ajili ya usaidizi wa kibinadamu yametatiza zaidi kazi ya waendeshaji huduma katika sehemu nyingi za dunia, lakini kulingana na Iacomini "ukosefu wa fedha haukutokea leo: Programu nyingi hizi za kimataifa hazina fedha za kutosha, hazifikii fedha za kutosha kuweza kufanya shughuli zote zinazohitajika. Hii inafanya kuwa vigumu kwa waendeshaji wetu kufikia maeneo muhimu: bila ufikiaji wa haraka na salama wa kibinadamu hatuwezi kufikia maeneo ambayo yanahitaji zaidi.  Kwa sababu hiyo tunatoa wito kwa jumuiya ya kimataifa, lakini zaidi ya yote kwa pande zinazozozana, kutusaidia kuleta misaada mingi iwezekanavyo."

Kuna haja ya kujitolea kutoka Jumuiya ya kiafrika

Katika majuma ya hivi karibuni kumekuwa na mazungumzo ya uwezekano wa kusitisha mapigano katika eneo hilo, lakini hali bado ni tete. "Waasi walikuwa wametangaza kusitisha mapigano mapema mwezi Februari, lakini watu waliendelea kufa. Kwa hakika kuna haja ya kujitolea kutoka katika jumuiya ya Kiafrika, ni jambo la msingi, lakini la msingi sawa ni kujitolea kwa mataifa yenye nguvu duniani ambayo yapo katika nchi hii.  Ninarejea China, Marekani, Urusi, Ulaya, ambazo kwa namna fulani, pamoja na mamlaka za kikanda kama vile Rwanda na Burundi, zinaweza kuchukua jukumu la msingi. Kinachokuja ni makubaliano dhaifu, pia kwa sababu idadi katika nchi hii ni kubwa: tunazungumza juu ya taifa muhimu sana kutoka katika mtazamo wa kijiografia na rasilimali. Ni wazi kwamba juhudi za digrii 360 zinahitajika, lakini ni vigumu kwa jumuiya ya Afrika pekee kupata suluhisho."