நிகராகுவா நாட்டில் மற்றுமொரு ஆயர் கைது

மெரினா ராஜ் – வத்திக்கான்

நிகராகுவாவின் Matagalpa மறைமாவட்ட ஆயரான Rolando José Álvarez Lagos அவர்களுக்காகவும் மதகல்பா மறைமாவட்டத்தின் நலனுக்காகவும் செபித்ததற்காக Siuna மறைமாவட்ட ஆயர் Isidoro Carmen Mora Ortega அவர்கள் நிகராகுவா அரசினால் கைது செய்யப்பட்டுள்ளார்.

டிசம்பர் 20 புதன்கிழமை சியுனா மறைமாவட்டத்தில் உள்ள  தூய பேதுரு ஆலயத்தில் நிறைவேற்றிய திருப்பலின் போது மதகல்பா மறைமாவட்டத்தில் உள்ள அன்புமக்கள் அனைவருக்காக செபிப்போம் என்றும், ஆயர் Álvarez அவர்களுக்காக ஒன்றிணைந்து செபிப்போம் என்றும் கூறியதே, கைது செய்யப்பட்டதற்கான காரணம் என்றும் செய்திகள் கூறுகின்றன.

மதகல்பா மறைமாவட்ட மக்கள் மற்றும் ஆயர் ஆல்வாரெஸ்காக ஒன்றிணைந்து செபிப்போம். செபம், ஒற்றுமை, நம்பிக்கை, அன்பு, மென்மை ஆகியவற்றில் ஒன்றுபட்டிருப்போம் என்று சியுனா மறைமாவட்ட ஆயர் திருப்பலியில் பங்கேற்ற மக்களுக்கு எடுத்துரைத்தார் என்றும், இதனாலேயே நிகராகுவா அரசு ஆயரை உறுதிப்பூசுதல் அருளடையாளம் வழங்கச் சென்று கொண்டிருக்கும் போது கைது செய்துள்ளதாகவும் செய்திகள் தெரிவிக்கின்றன.

நிகராகுவா ஆட்சிக்கு எதிராக சதி மற்றும் தவறான செய்திகளைப் பரப்பியதாகக் குற்றம் சுமத்தப்பட்டு, கடந்த பிப்ரவரி மாதம் 26ஆம் தேதி கைது செய்யப்பட்டு 26 ஆண்டுகள் சிறைத்தண்டனை பெற்றிருக்கும் ஆயர் ஆல்வாரேஸ் அவர்களை அடுத்து நிகராகுவாவில் ஆயர் Mora Ortega அவர்களுடன் Alester Sáenz  மற்றும்  Tony Palacio என்னும் இரண்டு அருள்பணித்துவ மாணவர்களும் கைது செய்யப்பட்டுள்ளனர்.

கடந்த புதன்கிழமை கைது செய்யப்பட்ட இவர்கள் மூவரும் இன்று வரை எங்கு உள்ளனர் என்ற செய்தி தெரியவில்லை.