செயல்களில் மகிழ்ச்சியுடனும் உறுதியுடனும் இருங்கள் : திருத்தந்தை

செல்வராஜ் சூசைமாணிக்கம் - வத்திக்கான்

காரித்தாஸ் பணி என்பது,  நிகழ்காலத்தில் தொடரும், மற்றும் எதிர்காலத்தின் நம்பிக்கை கதவுகளைத் திறக்கும் ஒரு பணியாகும் என்றும், இது, சிலுவையில் அறையப்பட்ட கிறிஸ்துவின் முகத்தில் துன்புறுவோரைக் கண்டு, அவர்களுக்கு நட்பு, உதவி, ஆறுதல் ஆகியவற்றை வழங்குவதற்கு வழிவகுக்கிறது என்றும் காரித்தாஸ் அமைப்பு ஒன்றிடம் கூறியுள்ளார் திருத்தந்தை.

ஸ்பெயினில் காரித்தாஸ் அமைப்பு தொடங்கப்பட்டதன் 75-ஆம் ஆண்டை கொண்டாடும் நிலையில், ஸ்பெயின் காரித்தாஸ் தலைவர் Manuel Bretón Romero அவர்களுக்கு அனுப்பியுள்ள கடிதத்தில் இவ்வாறு கூறியுள்ள திருத்தந்தை பிரான்சிஸ், இறைவனுக்கு நன்றி கூறவும், தூய ஆவியானவரின் வழிகாட்டுதலில் புதிய திட்டங்களுக்கான பாதைகளை அறிந்துகொள்ளவும் அழைப்புவிடுத்துள்ளார்.

காரித்தாஸின் பயணம் என்பது, விளிம்பு நிலையினரோடு பயணம், இரக்கத்தின் பயணம்,  புதுப்பித்தலின் பயணம்  என அவ்வமைப்பிற்கே உரிய மூன்று முக்கிய பயணங்கள் பற்றி அக்கடிதத்தில் எடுத்துக்காட்டியுள்ளார் திருத்தந்தை பிரான்சிஸ்.

ஏழைகளும் புறந்தள்ளப்பட்டோரும் நம் கதவைத் தட்டும் வரை நாம் காத்திருக்க கூடாது, மாறாக, நாமே அவர்களைச் சந்திக்கச் செல்ல வேண்டும் என்றும், அவர்களின் நன்மையையும் முழு வளர்ச்சியையும் தேட வேண்டும் என்றும், அவர்களின் மனிதமாண்பு மற்றும் உரிமைகளை அங்கீகரிக்க வேண்டும்" என்றும் தனது கடிதத்தில் வலியுறுத்தியுள்ளார் திருத்தந்தை பிரான்சிஸ்.