அன்புகூர்பவர்கள் மட்டுமே முன்னேற்றம் காண்கிறார்கள்!

செல்வராஜ் சூசைமாணிக்கம் - வத்திக்கான்

நல்ல நோக்கங்கள் என்ற போர்வையில் அடிக்கடி நம்மை எதார்த்தத்திலிருந்து பிரித்து முன்னேற விடாமல் தடுக்கும் கடுமையான கருத்தியல் நிலைப்பாடுகளுக்கு எதிராக விழிப்புடன் இருப்போம் என்று கேட்டுக்கொண்டுள்ளார் திருத்தந்தை பிரான்சிஸ்.

டிசம்பர் 21, இவ்வியாழன்று, திருப்பீடத்தின் தலைமை நிர்வாக அதிகாரிகளுக்கு வழங்கிய கிறிஸ்து பிறப்பு செய்தியில் இவ்வாறு அறிவுறுத்திய திருத்தந்தை செவிமடுத்தல், தெளிந்துதேர்தல், பயணம் ஆகிய மூன்று தலைப்புகளின்கீழ் தனது கருத்துகளைப் பகிர்ந்துகொண்டார் திருத்தந்தை.

01. செவிமடுத்தல்

அன்னை மரியா எப்படி செவிமடுப்பது என்பது குறித்து நமக்கு நினைவூட்டுகிறார் என்றும், 'இஸ்ரயேலே, செவிகொடு!' (காண்க இச 6:4) கட்டளைகளில் முதன்மையானதும் மிகப் பெரியதுமான கட்டளைகளை மரியா நமக்கு நினைவூட்டுகிறார், ஏனென்றால் எந்தக் கட்டளையையும் விட முக்கியமானது, கடவுளின் அன்பின் கொடையை ஏற்றுக்கொள்வதன் வழியாக அவருடைய இறையுறவில் நுழைவதுதான் என்றும் கூறினார் திருத்தந்தை.

திருவிவிலியத்தில் செவிமடுப்பது என்பது, காதுகளால் மட்டுமல்ல, இதயம் மற்றும் ஒருவரின் முழு வாழ்க்கையையும் கேட்பதைக் குறிக்கிறது என்றும் உரைத்த திருத்தந்தை, ஒரு செய்தியைக் கேட்பது அல்லது தகவலைப் பரிமாறிக்கொள்வதை விட இதயத்துடன் கேட்பது என்பது மிக அதிகம்; இது மற்றவர்களின் ஆசைகள் மற்றும் தேவைகளை உள்வாங்கக்கூடிய ஒரு உள் திறந்த தன்மையை உள்ளடக்கியது என்றும், சில வேளைகளில் நம்மைச் சுற்றியுள்ளவர்களை புறாக் குழிக்கு இட்டுச் செல்லும் வடிவங்களையும் தப்பெண்ணங்களையும் கைவிடும்படி தூண்டும் உறவு என்றும் எடுத்துக்காட்டினார்.

செவிமடுப்பது என்பது எப்போதும் ஒரு பயணத்தின் தொடக்கம் என்றும், இயேசு, தம்முடைய மக்களை இப்படி இதயப்பூர்வமாக செவிமடுக்கும்படியும், வாழும் இறைவன் தம்முடன் உறவுகொள்ளும்படியும் நம்மைக் கேட்கிறார் என்றும் கூறினார் திருத்தந்தை.

அன்புச் சகோதரரே, செவிமடுக்கும் கலையை நாம் கற்றுக்கொள்ள வேண்டும். நமது அன்றாட பணிகள் மற்றும் பொறுப்புகளை விடவும், அல்லது நாம் வகிக்கும் பதவிகளை விடவும் இது மிகவும் முக்கியமானது என்று அறிவுறுத்திய திருத்தந்தை, உறவுகளின் மதிப்பை மதிப்பிடுவதும், அவற்றை எளிமையாகவும் நேராகவும், நற்செய்தியின் ஆவியால் குறிக்கப்பட்டதாகவும், எல்லாவற்றிற்கும் மேலாக ஒருவருக்கொருவர் செவிசாய்க்கும் திறன் வழியாகவும் இருக்க வேண்டும்.

02. தெளிந்துதேர்தல்

ஒருவருக்கொருவர் செவிமடுப்பது, தெளிந்துதேர்தலை நமது செயல்பாட்டிற்கான ஒரு முறையாகக் கொள்ள உதவுகிறது என்றுரைத்த திருத்தந்தை, அப்படியானால், தெளிந்துதேர்தல் நம் அனைவருக்கும் முக்கியமானது. ஆன்மிக வாழ்வின் ஒரு கலையாக, அறிவியலின் அனைத்து மாயையிலிருந்து, விதிகளைப் பயன்படுத்தினால் போதும் என்று நினைக்கும் ஆபத்திலிருந்து, திருஅவையின் தலைமைப்பீட  வாழ்க்கையில் கூட, அதைத் தொடர ஆசைப்படுவதிலிருந்து, வெறுமனே திரும்பத் திரும்பச் சொல்வதன் வழியாக அது நம்மை அகற்றும்என்றும் விளக்கினார்.

அப்படியானால், கடவுளுடைய விருப்பதைத் தேடுவதற்கும், நம் இதயத்தின் ஆழமான கிளர்ச்சிகளுக்கு உணர்திறன் கொண்டவர்களாக இருப்பதற்கும் பின்னர் நமது சாத்தியக்கூறுகள் மற்றும் நாம் எடுக்க வேண்டிய முடிவுகளை மதிப்பீடு செய்வதற்கும் நாம் ஆன்மிகத் தேர்ந்துதெளித்தலை பயிற்சி செய்ய வேண்டும் என்றும் கேட்டுக்கொண்டார் திருத்தந்தை.

திருப்பீடத்தின் தலைமை நிர்வாகப் பணிகளில் கூட, தூய ஆவியாருக்குக் கீழ்ப்படிவதற்கும், நடைமுறைகளைத் தேர்ந்தெடுப்பதற்கும், உலக அளவுகோல்களின் அடிப்படையிலோ அல்லது வெறுமனே விதிகளைப் பயன்படுத்துவதன் வழியாகவோ அல்ல, மாறாக, நற்செய்தி காட்டும் விழுமியங்களின் அடிப்படையில் முடிவுகளை எடுப்பதற்கும் இந்தத் தேர்ந்துதெளிதல் நமக்கு உதவ வேண்டும் என்றும் எடுத்துரைத்தார் திருத்தந்தை.

03. பயணம்

பயணம் என்று சொல்லும்போது, இங்கே நாம் இயல்பாகவே மூன்று அரசர்களைப் பற்றி நினைவுகூர்வோம். இம்மூவரின் தேடுதலும் பயணத்தின் முக்கியத்துவத்தை நமக்கு நினைவுபடுத்துகின்றன என்று கூறிய திருத்தந்தை, நற்செய்தியின் மகிழ்ச்சி என்பது,  உண்மையாக ஏற்றுக்கொள்ளப்படும்போது, அது சீடத்துவத்துக்கு வழிவகுக்கிறது என்றும் இது நம்மையே மறந்து இறைவனைச் சந்திப்பதற்கும், வாழ்க்கையின் முழுமைக்குச் செல்வதற்கும் வழிவகுக்கிறது என்றும் எடுத்துக்காட்டினார்.

இங்கே திருப்பீடத்தின் தலைமை நிர்வாகப் பணியிலும் முன்னோக்கிச் செல்வது, உண்மையைப் பற்றிய நமது புரிதலில் தேடுவது மற்றும் அதில் வளர்வது, நிலைத்து நிற்கும் சோதனையை முறியடித்து, நம் அச்சங்களை எதிர்க்கும் திறனை ஒருபோதும் விட்டுவிடாமல் இருப்பது முக்கியம் என்றும் வழிகாட்டினார் திருத்தந்தை.

நல்ல நோக்கங்கள் என்ற போர்வையில் அடிக்கடி நம்மை எதார்த்தத்திலிருந்து பிரித்து நம்மை முன்னேற விடாமல் தடுக்கும் கடுமையான கருத்தியல் நிலைப்பாடுகளுக்கு எதிராக விழிப்புடன் இருப்போம் என்று அறிவுறுத்திய திருத்தந்தை, அதற்குப் பதிலாக, மூன்று அரசர்களைப் போல, எப்போதும் நம்மை வழிநடத்த விரும்பும் விண்மீனாகிய ஒளியைப் பின்தொடர்ந்து, சில வேளைகளில் ஆராயப்படாத பாதைகள் மற்றும் புதிய பாதைகள் வழியாகப் புறப்படவும் பயணிக்கவும் நாம் அழைக்கப்படுகிறோம் என்றும் கூறினார்.