ஏப்ரல் மேயில் திருத்தந்தை பங்கேற்கும் நிகழ்ச்சிகள்

கிறிஸ்டோபர் பிரான்சிஸ் – வத்திக்கான்

ஏப்ரல் மாதம் 28ஆம் தேதி திருத்தந்தை பிரான்சிஸ் அவர்கள் வெனிஸ் நகரில் திருப்பயணம் மேற்கொள்ளவுள்ளதையும் குறிப்பிட்டு, மே மாதத்தில் அவர் பங்கேற்கும் திருவழிபாட்டுச் சடங்குகள் மற்றும் இத்தாலிக்குள்ளான ஒரு திருப்பயணம் பற்றி விவரங்களை ஏப்ரல் 12, வெள்ளிக்கிழமையன்று வெளியிட்டுள்ளது திருப்பீட வழிபாட்டுத் துறை.

இம்மாதம் 28ஆம் தேதி இத்தாலியின் வெனிஸ் நகருக்கு ஒரு நாள் திருப்பயணம் மேற்கொள்ளும் திருத்தந்தை பிரான்சிஸ் அவர்கள், மே மாதம் 18ஆம் தேதி வெரோனா நகருக்கு மேய்ப்புப்பணி சார்ந்த திருப்பயணம் மேற்கொள்ளவுள்ளதாகவும் அறிவிக்கப்பட்டுள்ளது.   

மே மாதத்தில் இத்தாலியின் வெரோனா நகருக்கான திருப்பயணம் தவிர, மே மாதம் 9ஆம் தேதி வத்திக்கான் புனித பேதுரு பெருங்கோவிலில், இயேசு வானகத்திற்கு மேலெழுந்துச் சென்ற பெருவிழா திருப்பலி, 19ஆம் தேதி பெந்தகோஸ்தே பெருவிழா திருப்பலி, 26ஆம் தேதி தூய மூவொரு கடவுள் பெருவிழா திருப்பலி ஆகியவைகளை நிறைவேற்றுவார் என அறிவிக்கப்பட்டுள்ளது.

இயேசுவின் விண்ணேற்றத் திருப்பலி மே 9ஆம் தேதி உரோம் நேரம் மாலை 5.30 மணிக்கும், மே 19ன் பெந்தகோஸ்தே திருப்பலி காலை 10 மணிக்கும், மே 26ன் தூய மூவொரு இறைவன் விழா திருப்பலி காலை 10.30 மணிக்கும் வத்திக்கான் புனித பேதுரு பேராலயத்தில் நிறைவேற்றப்படும் என தெரிவிக்கப்பட்டுள்ளது.