இயேசுவின் திரு இதயத்திற்கு அர்ப்பணிக்கப்பட்ட புதியதொரு ஆவணம்!

செல்வராஜ் சூசைமாணிக்கம் -வத்திக்கான்

திருஅவையின் புதுப்பித்தலின் பாதையை ஒளிரச் செய்வதற்கும், இதயத்தை இழந்துவிட்டதாகத் தோன்றும் இவ்வுலகிற்குக் குறிப்பிடத்தக்க ஒன்றைச் சொல்லுவதற்கும் இயேசுவின் தூய்மைமிகு இதயத்திற்கு அர்ப்பணிக்கப்பட்ட ஒரு ஆவணத்தை எழுதத் தயாராகி வருவதாக அறிவித்துள்ளார் திருத்தந்தை பிரான்சிஸ்

ஜூன் 5, இப்புதனன்று, தனது புதன் மறைக்கல்வி உரைக்குப்பின்பு, இந்தத் தகவலை வழங்கிய திருத்தந்தை, இம்மாதம் இயேசுவின் தூய்மைமிகு இதயத்திற்கு அர்ப்பணிக்கப்பட்டுள்ளது என்பதையும், கடந்த டிசம்பர் 27 அன்று அலகோக், புனித மார்க்கிரீத் மேரிக்கு திரு இருதய ஆண்டவர் காட்சியளித்ததன் 350-வது ஆண்டு நிறைவைக் கொண்டாடியதை நினைவு கூர்ந்தும் இந்த அறிவிப்பை வெளியிட்டுள்ளார்.

உலகெங்கிலும் உள்ள பல நாடுகளில் இந்தப் பக்திக்கான கொண்டாட்டங்கள் தொடங்கியதாகவும், அவை அடுத்த ஆண்டு ஜூன் 27 ஆம் தேதி நிறைவடையும் என்றும் கூறியுள்ளார் திருத்தந்தை.

மேலும் இந்தக் காரணத்திற்காக, முந்தைய திருஅவை ஆசிரிய நூல்களின் விலைமதிப்பற்ற பிரதிபலிப்புகள் மற்றும் நற்செய்தி நூல்களுக்கு முற்பட்ட நீண்ட வரலாற்றை சேகரிக்கும் ஒரு ஆவணத்தை, இந்தப் பக்தி முயற்சியை மீண்டும் அறிமுகம் செய்யும் வகையில் தயாரிக்கவிருப்பதாகவும் கூறியுள்ளார் திருத்தந்தை.