புத்தாண்டின் முதல் வாரத்தில் காசாவில் 74 குழந்தைகள் மரணம்!

செல்வராஜ் சூசைமாணிக்கம் -வத்திக்கான்

அறிக்கைகளின்படி, 2025-ஆம் ஆண்டின் முதல் ஏழு நாட்களில் காசா பகுதியில் நடந்து வரும் வன்முறையால் குறைந்தது 74 குழந்தைகள் கொல்லப்பட்டுள்ளனர் என்று தெரிவித்துள்ளது அந்நாட்டிற்கான யுனிசெஃப் நிறுவனம்.

ஜனவரி 8, இப்புதனன்று, இத்தகவலை வழங்கியுள்ள அந்நிறுவனம், காசா நகரம், கான் யூனிஸ். தெற்கில் அல் மவாசி ஆகிய இடங்களில் இடம்பெற்ற இரவு நேரத் தாக்குதல்கள் உட்பட பல சம்பவங்களில் இந்தக் குழந்தைகள் கொல்லப்பட்டனர் என்றும், மிக அண்மையில் இடம்பெற்ற தாக்குதலில், அதாவது, இச்செவ்வாயன்று, அல் மவாசியில் ஐந்து குழந்தைகள் கொல்லப்பட்டனர் என்றும் கவலை தெரிவித்துள்ளது.

கடுமையான குளிர்காலம் மற்றும் போதிய தங்குமிடங்கள் இல்லாததால், டிசம்பர் 26 முதல், எட்டு பிறந்த குழந்தைகள் தாழ்வெப்பநிலை காரணமாக இறந்துள்ளன என்றும் குறிப்பிடும் அதன் அறிக்கை, 10 இலட்சத்திற்கும் அதிகமான குழந்தைகள் இடம்பெயர்ந்து, போதிய மனிதாபிமான உதவியின்றி தற்காலிக கூடாரங்களில் வாழ்கின்றனர் என்றும், அங்குக் குடிமுறைக்குரிய ஒழுங்கு வீழ்ச்சியடைந்துள்ளது என்றும், அதன் அறிக்கையில் கூறியுள்ளது.

இத்துயரமான தருணத்தில், உடனடி போர்நிறுத்தம், அனைத்துலக மனிதாபிமான சட்டத்தை பின்பற்றுதல் மற்றும் துன்பத்தை போக்க மனிதாபிமான அணுகலை மேம்படுத்துதல் குறித்து வலியுறுத்தியுள்ள யுனிசெஃப் நிறுவனம், குறிப்பாக, பாதிக்கப்படக்கூடிய குழந்தைகள் மற்றும் மோசமான நிலைமைகளை எதிர்கொள்ளும் புதிதாகப் பிறந்த குழந்தைகளுக்கு, உயிர்களைக் காப்பாற்ற உதவி விநியோகம் முக்கியமானது என்பதையும் சுட்டிக்காட்டியுள்ளது.