ጭውያ ካህን ኣብ ናይጀሪያ

ስምዖን ተ. ኣርኣያ - ሃገረ ቫቲካን

ናይ ሃገረ ስብከት ካፋንቻን ናይጀርያ ዓቀቤ መንበር ኣባ ኤማኑኤል ካዛን ፋወህ ኣብ ግዝኣት ካዱና ኣብ ልዕሊ ካህናት ዝፍጸም ጭውያ ዘሰክፍ ምዃኑ ገሊጾም፥ “እቲ ዝተጨውየ ካህን ኣባ ኡከህ ብሰላም ናጻ ክልቀቕ ጻውዒት ብምቕራብ፡ ምእመናን ኣብ ስቓይ ንዝርከቡ ካህናትን ገዳማውያንን ገዳማውያትን ልኡካነ ወንጌልን ክጽልዩ ተላብዮም፡ ነቲ ኣብ ልዕሊ ንጹሃትን መከላኸሊ ዘይብሎም ዜጋታት ሰበኻታትና ዝፍጸም ዘሎ ዘይቋርጽ ጭውያ ንኹንን” ከም ዝበሉ ዝሓበረ ዜና ቫቲካን ኣስዒቡ፥ ኣባ ገብሪየል ኡከህ ኣብ ሰሜናዊ ምዕራብ ናይጀርያ ኣብ ዝርከብ ቤተ ክርስቲያን ቅዱስ ቶማስ ዕለት 9 ሰነ ሰቢሮም ብዝኣተዉ ዕጡቓት ጉጅለ ከም ዝተጨውየ ናይታ ሰበኻ ሓበሬታ ተወኪሱ የመላኽት።

ቅልውላው ጸጥታ

ኣብ መላእ ናይጀርያ ጭውያታት እናሰፈሐ ይኸይድ ከም ዘሎን፥ እቲ ዝፍጸም ጭውያ ብፖለቲካዊ ወይ ርእየት ዓለም ምኽንያት ዝገበረ ከም ዝኾነን ካብ ግንቦት 2023 ዓ.ም. ጀሚሩ ልዕሊ 4 ሽሕ ጭውያ ከም ተፈጸመን ኣብ መጀመርታ ናይዚ ዓመት፡ ዛዕባ ስብከተ ወንጌል ዝሓልይ ናይ ቅድስቲ መንበር ላዕለዋይ ቤት ጽሕፈት ነቲ ማዕበል ጭውያ ዝኹንን ኣብ ዘውጸኦ መግለጺ፡ ኣብ ቅድሚ እቲ ቅልውላው ምስ ህዝቢ ናይጀርያ “ዝዓሞቐን ልባውን ሓገዙን ቅርበቱን” ገሊጹ ከም ዝነበረ ዜና ቫቲካን የዘኻኽር።

ጻውዒት ጸጥታን ውሕስነትን

ድሕሪ’ቲ ናይ ሰንበት ጭውያ፡ እቲ ካብ ዕለት 15 - 19 ሰነ ኣብ ሃይማኖት ምስልምና ዝበዓል ዒድ ኣል ኣድሓ፡ ምኽንያት መንግስቲ “ሓለዋ ጸጥታን ውሕስነትን” ናይ ምርግጋጽ ሓላፍነት ክብ ከብል ዓቃቤ መንበር ናይ ሃገረ ስብከት ካፋንቻ ኣባ ኤማኑኤል ካዛን ፋወህ ሓቲቶም “ኣባ ኡከህ ብቕልጡፍ ንኽፍታሕ ምስ ሓይልታት ጸጥታ ኣብ እንሰርሓሉ ዘለና እዋን፡ ብዘይ ቂምን በቐልን ሕጋዊ መገድታት ምጥቓም የድሊ - ኣባ ኡከህን ካልኦት ኣብ ዝተፈላለየ ዞባ ናይጀሪያ ዝተጨውዩ ናጻ ክልቐቑ ጻውዒት ነቕርብ” ከም ዝበሉ ዜና ቫቲካን ኣፍሊጡ።