መዓልቲ ሕሙማት ፦ ር. ሊ. ጳ. ምእንቲ ምያንማርን ፍልስጥኤምን እስራኤልን ዩክረይን ንጸሊ

ኣባ ተወልደ መብራህቱ - ሃገረ ቫቲካን

ርእሰ ሊቃነ ጳጳሳት ፍራንቸስኮ ነቶም ኣብ ናይ ሰንበት ጸሎት መልኣከ እግዚአብሔር ንምስታፍ ኣብ ቅርዓት ቅዱስ ጴጥሮስ እተረኽቡ ምዕመና አብ ዘቅረብዎ ቃል ሰላምታን ምሕጽንታን፣ ዕለት 11 ለካቲት ዓለም ለኻዊት መዓልቲ ሕሙማት ከም ምዃና ብምግላጽ፣ እዛ መዓልቲ እዚኣ "ኣብዛ ዓመት እዚኣ፣ እቲ ኣብ ግዜ ሕማም ዘሎ ርክባትና ክሳዕ ክንደይ ኣድላዪ ምዃኑ ከነስተንትን ከም ዝድርኸና" ገለጹ።

ኣብዚ መዳይ እዚ ርእሰ ሊቃነ ጳጳሳት ከም ዝገለጽዎ፣ ኣብ ግዜ ሕማምና ብቐዳምነት ዘድልየና ነገር እንተሎ "ናይ እነፍቅሮም ሰባት ቅርበት ኢዩ፣" ከምኡውን ናይቶም ሰብ ሞያ ጥዕናን ኮይኑ፣ ልዕሊ ኹሉ ድማ ኣምላኽ ከም ዘድልየና ኣመልከቱ ።

ርእሰ ሊቃነ ጳጳሳት "ኵላትና ናብቶም መከራ ዚወርዶም ኬድና ክንቀርቦም ኢና ተጸዊዕና " ብምባል ኣጕልሑ ፣ እዚ ኸኣ ምስቶም ዝሓመሙ ወይ ድኹማት ከም ዘሎና ቅርበት ኢዩ ዘመልክት በሉ።

ድሕርዚ ርእሰ ሊቃነ ጳጳሳት ፍራንቸስኮ ሎሚ ነዛ ዕለት እዛ ከነኽብር ከሎና ብስቕታ ዘይኮነስ - "ብዛዕባ እቶም ሎሚ መሰል ናይቶም ጥዕናዊ ክንክንን ግቡዕን ዘይረኸቡ፣  ህይወት ውን እተነፍጎም ኣዝዮም ብዙሓት ሰባት ምህላዎም ብምዝካር ኢና ከነኽብሮ ዘሎና ። "

"ሎሚ ብዛዕባ እቶም ኣብ ክቱር ድኽነት ዚነብሩ ዘለዉ እሓስብ ኣለኹ፣ ከምኡ ውን ብዛዕባ ዞባታት ውግእ እሓስብ ኣለኹ - መሰረታዊ ሰብኣዊ መሰላት መዓልታዊ ይገሃስ ኢዩ ዘሎ! እዚ ድማ ክትጻወሮ ዘይከኣል እዩ" በሉ ። ድሕርዚ ርእሰ ሊቃነ ጳጳሳት ፍራንቸስኮ ምእንቲ ምያንማር ዩክረይን ፍልስጥኤም ከምኡውን እስራኤል ጸልዮም ።