ር.ሊ.ጳ. ፍራንቸስኮ ብምዕልቕላቕ ማይ ንዝሳቐ ህዝቢ ብራዚል ቅርበቶምን ጸሎቶም የረጋግጹ

ስምዖን ተ. ኣርኣያ - ሃገረ ቫቲካን

ካብ መወዳእታ ወርሒ ሚያዝያ ጀሚሩ ኣብ ደቡባዊ ብራዚል ብዘጋጠመ ብርቱዕ ዝናምን ብዝፈጠሮ ምዕልቕላቕ ማይን ዝሞቱ 137 ከም ዝኾኑን ቁጽሪ ተመዛበልቲ ልዕሊ 600 ሽሕ ከም ዝበጸሐን፡ እዚ እውን ኣብታ ምስ ኣርጀንቲናን ኡራግዋይን እትዳወብ ግዝኣት ሪዮ ግራንደ ዶ ሱል ዝምልከት ኮይኑ፡ ጽዓት እቲ ዝናም እናወሰኸ ይኸይድ ከም ዘሎን ኣብ ዝቕጽሉ ሰዓታት እውን ብርቱዕ ክኸውን ከም ዝኽል ናይ ብራዚል መጽናዕቲ ስነ ኩነታት ኣየር ማእከል ይሕብር።

ቅርበትን ጸሎትን ር.ሊ.ጳ. ፍራንቸስኮ

ር.ሊ.ጳ. ፍራንቸስኮ ንኹሎም ብቐንዱ ድኻ ህዝቢ ዝጸሉ ሓደጋ ዝሳቐዩ ንዘለዉ ናብ ናይ ከተማ ፖርቶ ኣለግረ ሊቀ ጳጳሳት ኻይመ ስፐንግለር ዕለት 11 ግንቦት ስልኪ ብምድዋል ቅርበቶምን ጸሎቶም ከም ዘረጋገጹ ሊቀ ጳጳሳት ስፐንግለር ሓቢሮም፥ እዚ እውን ቅዱስ ኣቦና፥ ንኹሎም በዚ ሓደጋ ዝሳቐዩ ንዘለዉ ሓገዝ ከይፍለዮም ጻውዒት ከም ዝቕረቡ ኣብ ዝሃብዎ ጋዜጣዊ መግለጺ ከም ዘፍለጡ ዜና ቫቲካን የመላኽት።

ጭቡጥ ሓገዝ

ር.ሊ.ጳ. ፍራንቸስኮ ድሮ ሰንበት ፍርቂ መዓልቲ ዕለት 5 ግንቦት ጸሎት ንግስተ ሰማይ ኣዕሪጎም ምስ ኣብቅዑ ኣብ ብራዚል ብዝዘነመ ብርቱዕ ዝናምን ብዘስዓቦ ምዕልቕላቕ ማይን ዝተሃስዩ ህዝቢ ቅርበቶም ገሊጾም ከም ዝነበሩን ንናይ ሪዮ ግራንደ ዶ ሱል ብራዚል ኣዚዩ ዝተሃሰየ ዞባ ንዝሞቱ “እግዚኣብሔር ኣብ መግንስቱ ይቀበሎም - ቢሎም - ንኣባይቲ ስድራ ምዉታት ነቶም ዝተመዛበሉን የጸናንዕ” ከም ዝበሉ ዘዘኻኸረ ዜና ቫቲካን ኣስዒቡ፥ ሊቀ ጳጳሳት ስፔንግለር ኣብ ዝሃብዎ መግለጺ እቲ ናይ ቅዱስ ኣቦና ቅርበትን ጸሎትን ብጭቡጥ ናይ ሓገዝ ምልክት ዝተሰነየ ምዃኑ ኣረጋጊጾም፡ ኣብ ብራዚል ዝርከብ ናይ ቅድስቲ መንበር ሓዋርያዊ ልኡኽ ንዝተጸገሙ ሓገዝ ዝውዕል ብቅዱስ ኣቦና ብርክት ዝበለ ሓገዝ ከምዝተመደበ እውን ከም ዝሓበርዎም ኣፍሊጦም ይብል።